JABURU 92 - KITABI HABARI MOPIOHE

Lahu lo poloi̒laalo momuji

¹ Lahu duo̒lo dulahu Saabati.

² Otutu mopiohulo mola mosukuru to Eeya, yaa Eeya wau momuji to Eeya, Allahu Taa̒ala Taa Laba-labaalo molanggato;

³ mopololade ponu lo Eeya tou̒ dimodupo, wau otatapu wau molotolo hilao lo Eeya tou̒ hui,

⁴ sambela mokuti hitari mopuulo tali, tunutunuhu gaambusi wau kocapi.

⁵ Sababu huhutu lo Eeya moe̒engahe hilaa lowatotia, watotia mopolahu mola wolo weengahu sababu ilomata lo Eeya.

⁶ Malo odito udaa̒alio totoonulalo huhutu lo Eeya, yaa Eeya, malo odito delomio totoonulalo pikiilangi lo Eeya!

⁷ Taa u mohulodu diila moo̒ toneo̒, taa abaloolo diila moo̒ paahamu mao̒.

⁸ Mowaliilio taa momaahu parenta mobutu mola molomiodu debo odelo huo̒yoto, wau taa moleeto he oduheenga mola kayaalio wau maa̒muru; bo timongolio mapo binasaalo sama-samaata,

⁹ sababu Eeya, yaa Eeya, okawasa ohiheo-hiheolo mao̒.

¹⁰ Otaawa lo mongowatotia musu lo Eeya mapo binasaalo, yaa Eeya, ngoa̒amila taa moleeto mapo bubuu-alaalio.

¹¹ Eeya lohutu olo watotia debo odelo lotolo sapi lo oa̒ayua u molinggelo, wau lobalakati olo watotia wolo osanangi tutu.

¹² Watotia loo̒onto ololaahe lo mumuu-suwaalo watotia, tau-tauwalo tamalo bongu mai helo luwali olo watotia, totoonulalo patuju limongolio u moleeto mai̒lo dungohe lowatotia.

¹³ Taa juujulu helo tumbungai debo odelo bungo lohuruma, wau mobutu molomiodu debo odelo bungo lo ayu woohu to Libanon.

¹⁴ Timongolio debo odelo bungo lo ayu u pilomulo to Bele lo Eeya, wau longoa̒alo to Bele lo Allahu Taa̒alanto,

¹⁵ bungo lo ayu u donggo hemomungo totembo pilanggola mola, debo moidu wau mopiohu.

¹⁶ Uitolo bukutiilio deu̒ Eeya aadili; tio tamooduulua ola-U̒, diaaluo u diila juujulu to Eeya.