JABURU 91 - KITABI HABARI MOPIOHE

To delomo duo̒lo Allahu Taa̒ala

¹ Taa u motiduo̒la to Taa Laba-labaalo molanggato, wau motibiluloa̒ todelomo wunelo Taa Laba-labaalo kawasa,

² mowali moloi̒ya to Eeya, “Eeyaalo tamooduulua wau tamoo-duo̒lawa olaatia, yaa Allahu Taa̒ala lowatotia, to Eeyaalo watotia palacaya.”

³ Eeya mamo lopatai olemu monto baala u tuutuuo̒, wau monto ngongoto u modelo ode mautu.

⁴ Eeya mamolau̒bei olemu wolo polipi-I̒o, tilinggula yio̒ aamani todelomo wolungo Eeya; otatapu wau molotolo hilao lo Eeya debo odelo porisai u moduo̒lai olemu.

⁵ Yio̒ diila mao̒ oohe matopotala tou̒ hui, meaambo debolo tuhuwolo tou̒ dulahu;

⁶ lobaala u meidungga tou̒ modio̒lomo, meaambo oa̒antulu u molemba tou̒ mohuloonu.

⁷ Penu boli ngolihu lota mate totilimu, wau mopulu lolihu lota to ambahu olowalamu, bo yio̒ lohihilao diila tapaliyalo.

⁸ Wonu yio̒ momiloheo̒ to palitumu, yio̒ moo̒onto taa moleeto otuhata lo polotontuli.

⁹ Sababu yio̒ lopowali Eeya tamooduulua olemu, Taa Laba-labaalo molanggato pilowalimu tamoo-duo̒lawa olemu.

¹⁰ Yi yio̒ diila tao̒tuhata lobaala, belemu diila tao̒tuhata meaalo tembaa lo topotala.

¹¹ Allahu Taa̒ala mopoa̒hu malai̒kati-Lio modaha olemu, u moduo̒lai olemu penu ode utoonu ponao̒wamu.

¹² Timongolio mamomintaa̒ olemu to paladu lo uluu̒lio, alihu oa̒atumu diila mao̒ meiteduo̒ tobotu.

¹³ Yio̒ mamo lambangao̒ tulidu wau singa, molumbetaa̒a singa buboto wau tulidu obisa.

¹⁴ Tahuda lo Eeya, “Taa u ilohilao ola-U̒ mapoa̒ahuwo-U̒, tamomasisi ola-U̒ maduo̒la-U̒.

¹⁵ Wonu tio mongiibodu ola-U̒, Wau̒ mamolametai olio. Tou̒ oweepita, Wau̒ mamotulungi olio; tio malopato-U̒ wau wohiya-U̒ ohurumati.

¹⁶ Tio mapoluli-U̒ to hilao wolo tutumulo hayahaya, wau poa̒ahuwo-U̒.”