JABURU 90 - KITABI HABARI MOPIOHE

BUKU OPATIO: JABURU 90–106 Allahu Taa̒ala, tambati potiduo̒la lo manusia

¹ Dua̒ lei Musa, wato lo Allahu Taa̒ala. Yaa Eeya, Eeyaalo tambati potiduo̒la lo mongowatotia wawaalia mola.

² Tou̒ huhuu-ideyaalo diipo pilopowali mai, tou̒ huta wau dunia diipo pilohutu lo Eeya, Eeyaalo Allahu Taa̒ala tadebo ohiheo-hiheolo mao̒, diila o bohulio wau diila opulitio.

³ Eeya lopoa̒hu manusia lohualinga ode asaliilio, lowali peaahuo̒ debo odelo bohulio mai.

⁴ To Eeya ngolihu lotaunu debo odelo ngohui, dulahee olaango malo paluto; debo odelo tuwaulio lotayade u modaha tou̒ hui.

⁵ Eeya lopoyilihe olo mongowatotia; mongowatotia debo odelo tohi-tohiilopo, debo odelo huo̒yoto u boheli lobutu mai;

⁶ tou̒ dimodupo tio mobutu wau mongoa̒alo, bo mowali mololante tou̒ lolaangai.

⁷ Mongowatotia iloohea lo omuluka mai lo Eeya, wau lopulito binasa lo omuluka lo Eeya.

⁸ Eeya lopodutu totala lo mongowatotia totalu lo Eeya, dusa lo mongowatotia u tutuuo̒ iloontonga lo Eeya.

⁹ Tutumulo mongowatotia limbulimbu sababu omuluka lo Eeya, tataa-wunuwaalo mongowatotia lopulito debo odelo hiipo napasi.

¹⁰ Tembo tutumulo mongowatotia bo pitu lopulu lotaunu, wonu mongowatotia molotolo, walu lopulu lotaunu mola. Bo wambao̒ osuukali wau podutolo u hemotapu lo mongowatotia; lapatio mao̒ tutumulo u limbulimbu, mongowatotia mooli lomola.

¹¹ Tatoonu tamotota opolutuo̒ muluka lo Eeya, meaalo motuuu̒de mongalati akiibati omuluka lo Eeya?

¹² Pongalatiyalo mai mongowatotia lo ololimbui̒o tutumulo botie alihu mongowatotia mowali taa u obudi.

¹³ Yaa Eeya, tunggula omolua Eeya muluka? Pohualingolo mai wau ponualo mongo wato lo Eeya.

¹⁴ Poo̒daatalo mai daa̒ ponu lo Eeya ode mongowatotia timii̒du dimodupo, alihu mongowatotia meengahu wau mopolahu mola ngotupa lo tutumulo mongowatotia.

¹⁵ Wohiyalo mai ode mongowatotia osanangi tutu u mobaalia wolo polodutolo u hebantaa lo mongowatotia todelomo tataa-wunuwaalo polodutolo.

¹⁶ Pobilohelo mai huhutu lo Eeya ode mongowatotia mongo wato lo Eeya, wau kawasa lo Eeya u molamahu ode wali mai lo mongowatotia.

¹⁷ Yaa Eeya Allahu Taa̒ala lo mongowatotia, balakatialo mai mongowatotia, alihu totoonulalo kalaja lo mongowatotia otilapulo.