JABURU 9 - KITABI HABARI MOPIOHE

Dua̒ sukuru sababu ua̒adili lo Eeya

¹ Duo̒lo diriheni lopolemboa̒ tamoolahua. Lodudua̒a lahu Mut-Laben. Jaburu lei Dauda.

² Wolo lealeaatu lohilao watotia ohilaa mosukuru mola ode Eeya, yaa Eeya, wau mopololadu huhutu lo Eeya u moo̒linggolabe.

³ Watotia ohilaa motiwengahu wau motisanangi sababu Eeya wau momuji mola tanggulo Eeya, Eeya Taa Laba-labaalo molanggato.

⁴ Totalu lo Eeya musu lowatotia lobale wau tilumeteo̒; timongolio lodehu leiteduo̒ wau yilate.

⁵ Sababu Eeya momalenta odelo hakimu taa̒adili; Eeya malo poduulua palakala lo watotia.

⁶ Eeya malo hukuumani mai babaa-ngusawalo wau helo pobinaasa tau-tauwalo hileeta; timongolio yilipato u ohiheo-hiheolo mao̒.

⁷ Musu lo mongowatotia malo pulito pilopobinasa, kokoo-tawaalo limongolio he ilantulu lo Eeya; diduu̒ tahe loe̒ela mola.

⁸ Eeya momalenta u ohiheo-hiheolo mao̒; Eeya helo potihula tambati huhuloa̒ lo Eeya u momutoo̒ dunia.

⁹ Eeya momalenta babaa-ngusawalo wolo aadili wau momutoo̒ olimongolio wolo juujulu.

¹⁰ Eeya boito tambati potiduo̒la lotaa hideehea, tambati potiwunela tou̒ oweepita.

¹¹ Taa u motota to Eeya hipoharapua to Eeya, yaa Eeya, taa u hemolubo to Eeya diila tolaa lo Eeya.

¹² Pujialo mola Eeya tahe momalenta to Sioni! Wungguliaalo huhuutuu-Lio ode babaa-ngusawalo!

¹³ Sababu Eeya moe̒elai totaa u hiduutola wau diila molipata wuwatii̒ limongolio; taa u hipohutua diila omanusia hukuumanio lo Eeya.

¹⁴ Bilohilo, musu helo posikisa olo watotia; ponuwalo mai watotia, yaa Eeya, lopatalo mai watotia monto mautu,

¹⁵ alihu watotia momuji mola to Eeya totalu ulipu lo Yerusalemu. Watotia mamo tingalaa̒ mola meengahu sababu Eeya lopoa̒ahu mai olo watotia.

¹⁶ Babaa-ngusawalo tadiila motota lo Eeya modehu ode delomo huango u ilau̒de limongolio lohihilao; timongolio otaala todelomo pajala limongolio lohihilao.

¹⁷ Eeya malo poi̒laalo batangaa-Lio sababu putuusani lo Eeya ua̒adili. Taa moleeto lodehu sababu huhutuulio lohihilao.

¹⁸ Mautu yito pulitio lotau-tauwalo moleeto, babaa-ngusawalo tadiila hemo mandungi to Allahu Taa̒ala.

¹⁹ Diila u ohiheolo mao̒ taa mosikini pilalongo; diila u mololaalaaita tau modutolo lou̒ diila ohalaapani.

²⁰ Tihuloolo mai, yaa Eeya, butoi̒lo babaa-ngusawalo, diila mao̒ polulia manusia mopobatingga batangalio.

²¹ Poluliaalo mao̒ timongolio mamoohe, yaa Eeya, wau mongalati deu̒ timongolio bo manusia wambao̒.