JABURU 89 - KITABI HABARI MOPIOHE

Lahu tou̒ ilodungga lobaala

¹ Lahu pongaajali lei Etan, taulo Ejrahi.

Otatapu wau olootolo hilao lo Eeya Taa Laba-labaalo kawasa

² Odehu hilao lo Eeya, yaa Eeyau̒, mapolahuo mola lowatotia ohiheolo mao̒, otatapu wau olootolo hilao lo Eeya mapo habario lowatotia wawaalia mola.

³ Sababu otaawa lo watotia ponu lo Eeya tatapu ohiheo-hiheolo mao̒ wau diila opulitio, otatapu wau olootolo hilao lo Eeya motoheto debo odelo hulungo.

⁴ Eeya lotahuda mai, “Wau̒ malohutu daantia wolo taa tilulaotu-U̒; Wau̒ malo tadia to olei Dauda, wato-U̒:

⁵ Tambati huhuloa̒ li olongiamu biintengiya-U̒ u ohiheo-hiheolo mao̒, wawaalia mola walao̒ wombumu mamo tihuloa̒ao̒.’ ”

⁶ Sidangi lo sologawi momuji totoonulalo huhutu lo Eeya u moo̒linggolabu, wau mopolahu mola otatapu wau olootolo hilaa lo Eeya, yaa Eeya,

⁷ To hulungo diaaluo tadebo odelo Eeya, yaa Eeya, diaaluo mahaluku lo sologawi u tutuuwauwa wolo Eeya.

⁸ Eeya hurumatiolio to wolota lo tahi mantalia, oohelio lebe lou̒ ngoa̒amila to palito Eeya.

⁹ Eeya, Allahu Taa̒ala Taa Laba-labaalo kawasa, tatoonu tadebo odelo lotolo Eeya? Eeya tatapu wau molotolo hilao todelomo totoonulalo u hitua-tuawua yaa Eeya.

¹⁰ Eeya mongaawasa deheto u oliyoo̒ buo̒lo ulaba-labaalo, wau mopoo̒ole buo̒lolio u moo̒tihela hapato.

¹¹ Rahab, naha lodeheto pilopo toyopu lo Eeya wau pilate lo Eeya yila-yilateelo mao̒, wolo uluu̒ u molotolo ilolaahe lo Eeya mumuu-suuwaalo Eeya.

¹² Hulungo wau dunia yito miliki lo Eeya, dunia wau totoonulalo tuangio pilowali mai lo Eeya.

¹³ Eeyaalo talo powali mai tilaya wau huliaalio, Hui̒dee Tabor wau Hermon helo tingalaa̒ mola leengahu to Eeya.

¹⁴ Malo odito udaa̒ kawasa lo Eeya, wau malo odito polu-polutuo̒ olootolo Eeya!

¹⁵ Ua̒adili wau butoo̒ yito payu lo yilaidia lo Eeya, ponu wau otatapu boli olootolo hilao loi̒laalo todelomo totoonulalo huhutu lo Eeya.

¹⁶ Potisanangilo tutu bangusa tahemo ibaadati wolo wengahu, tatumu-tumula todelomo tinelo owoluo lo Eeya, yaa Eeya.

¹⁷ Ngotupa lodulahu timongolio meengahu wau debo molotolo, sababu opopiohu lo Eeya.

¹⁸ Eeya longohi mai olo mongowatotia heloo̒haama wolo mopiohe daa̒, sababu opopiohu lo Eeyaalo mongowatotia loo̒haama.

¹⁹ Sababu tamoo-duo̒lawa olamiaatia yito taa tilulaoto Eeya, yaa Eeya; olongia lamiaatia yito miliki lo Allahu Taa̒ala Mantali lo Isirai̒lu.

Danti lo Allahu Taa̒ala odelei Dauda

²⁰ Muloololio mai daa̒ todelomo bibilohe tuwau, Eeya lotahuda mai ode wato lo Eeya utatapu wau molotolo hilao, “Wau̒ malo tulungi ngotaalio lo pahalaawani, ngotaalio lo tatilulaotu-U̒ lonto ulipu mapilo laiu̒u-U̒.

²¹ Wau̒ maloo̒ dungga olei Dauda, wato-U̒, wau piluduu̒u-U̒ mao̒ tio wolo winulo tutuu-otalo odudaa̒.

²² Olootolu-U̒ malaito moduo̒la olio, kawasaa-U̒ mamo poo̒lotola olio.

²³ Tio diila tao̒laahe lomusu, wau diila tadeehe lotaa moleeto.

²⁴ Ngoa̒amila musulio mapobinasaa-U̒, patee-U̒ mate-mateelo mao̒ penu boli tatoonu tamolonua̒a olio.

²⁵ Wau̒ madebo momonu olio wau tatapu boli molotolo hilao to olio, wau mohutu olio lebe heo̒kaawasa mola.

²⁶ Yilaidialio mapoluasiyo-U̒ mola, monto Lau Tenga demola Dutulaa Eperat.

²⁷ Tio mamoloi̒ya ode Olau̒, ‘Eeyaalo ti Paapau̒, Allahu Taa̒alau̒, tamoo-duo̒laawa wau tamoo-poa̒ahua olau̒.’

²⁸ Wau̒ mamopowali olio walau̒u-U̒ talolai̒ tamohuhula daa̒, talaba-labaalo udaa̒ to wolota lo ngoa̒amila olongia.

²⁹ Tio madebo ponuwo-U̒ tunggula ohiheo-hiheolo mao̒, daantia-U̒ wolio debo motoheto.

³⁰ Tambati huhulo̒a li olongialio mapoduuluwa-U̒ ngotilonggadu hulungo woluo toitaato dunia, wawaalia mola walao̒ wombulio mamoti huloa̒ao̒.

³¹ Bo wonu waliilio mola molambanga butoo̒o-U̒, wau diila tumumulo modudua̒ palentaa-U̒,

³² wonu timongolio diila momandungi u matilantu-U̒ mai wau momalonga wuu̒du-U̒,

³³ timongolio mahukuu-maniyo-U̒ wolo buuboo̒ sababu helohutu totala, wau podunggaa-U̒ mai baala sababu duduu-sawaalo limongolio.

³⁴ Bo Wau̒ madebo momonu olei Dauda, wau diila tamomaahu otatapu wau olootolo hilaa-U̒.

³⁵ Daantia-U̒ wolio pomataa-U̒, monto danti-U̒ penu boli tuwau mao̒ muli hamaa-U̒.

³⁶ Pee̒enta u ohiheolo mao̒ Wau̒ motadia domi tanggulu-U̒ u mantali; Wau̒ diila tamo himbulo to olei Dauda.

³⁷ Tambati huhuloa̒ li olongialio mamoo̒ taahangi ngotilonggadu mato lodulahu donggo woluo, wawaalia mola walao̒ wombulio mamo tihuloa̒a teto.

³⁸ Yilaidialio debo woluo debo odelo hulalo, sakusi utatapu wau molotolo hilao to hehee-ngowaalo.”

Hilimuta mooloolo tou̒ ti olongia ilolaahelio

³⁹ Bo botia Eeya lomuluka toli olongia, Eeya lolapi wau diila lololimo taa tilulaotai lo Eeya.

⁴⁰ Diila pilomata lo Eeya daantia lo Eeya wolo wato lo Eeya, makutalio pilomahulo Eeya ode delomo latao̒.

⁴¹ Heiloo-lohubu Eeya didii-ngingaalo meeseli lo kotaalio, bibii-ntengiyalo pilowali lo Eeya tuodu.

⁴² Ngoa̒amila taa hilaode hemo lambata milikiilio, tio lowali hepilo ii̒iya lo tiheedio.

⁴³ Eeya helongohi u loo̒haama to mumuusuulio, wau helohutu ngoa̒amila musulio lotiwengahu.

⁴⁴ Tumbao̒ tingololio pilopowali lo Eeya diila ohuna, Eeya diila lomantu mai olio todelomo popaatea.

⁴⁵ Piloo̒o-pulito lo Eeya kawasaalio u molamahu, Tambati huhuloa̒ li olongialio pilomahulo Eeya ode huta.

⁴⁶ Eeya lopolimbuo̒ maasa humulalio, wau lohenggubei olio wolo wolito.

Dua̒ mei̒ lopatai

⁴⁷ Tunggula omolua Eeya motituuo̒, yaa Eeya? Tunggula omolua muluka lo Eeya wali-walihuhu debo odelo tulu?

⁴⁸ Eelalio mai watotia deu̒ malo odito limbui̒o tutumulo watotia botie, pilopowali mai lo Eeya manusia odelo mahaluku u panaa.

⁴⁹ Tatoonu tamowali tumumulo tulusi wau diila mate? Tatoonu tamoo̒ halahu monto kuubulu?

⁵⁰ Yaa Eeya, tou̒toonu tuoto ponu lo Eeya u bohulio mai, u pilodanti lo Eeya olei Dauda domi otatapu wau olootolo hilao lo Eeya?

⁵¹ Eelailo mai yaa Eeya, woloolo mola wato lo Eeya botie hilentei̒o, watotia helomanta polohina lonto dadaata bangusa.

⁵² Mumuu-suuwaalo Eeya helohina olongia tatilulaoto Eeya, yaa Eeya, helo hentea̒ olio penu boli ode utoonu ponao̒walio.

⁵³ Pujiaalo mola Eeya u ohiheo-hiheolo mao̒. Powalilo mola odito! Amin!