JABURU 86 - KITABI HABARI MOPIOHE

Dua̒ mei̒ tuulungi

¹ Dua̒ lei Dauda. Dungohilo mai dua̒ lo watotia, yaa Eeya, wau tametilo mai watotia, sababu watotia mosikini wau molulupuhu.

² Dahailo mai tutumulo watotia, sababu Eeya momonu olo watotia, poa̒ahuwalo mai wato lo Eeya botie tayakini to Eeya.

³ Eeyaalo Allahu Taa̒ala lowatotia, ponualo mai watotia yaa Eeya, sababu ilo-ilolaanga watotia hemodua̒ mola to Eeya.

⁴ Yaa Eeya, powengahulo mai hilaa wato lo Eeya botie, sababu bo to Eeya pomantahu lowatotia hilaa lowatotia.

⁵ Eeya mopiohu, yaa Eeya, wau ohilaa mongambungu, taa u hemodua̒ mola to Eeya debo ponuo mai lo Eeya wolo ponu u diilalo o eenggadelio.

⁶ Poo̒tuotilo mai dua̒ lowatotia, yaa Eeya, dungohilo mai iibodu lowatotia mei̒ tuulungi.

⁷ Tou̒ ileepita watotia hemodua̒ mola to Eeya, sababu Eeya hemo lametai olo watotia.

⁸ Yaa Eeya, diaaluo pujaaa̒ni debo odelo Eeya, diaaluo tamohutu wolo u pilohutu mai lo Eeya.

⁹ Ngoa̒amila bangusa tapilowali lo Eeya mamonao̒ mai, yaa Eeya, u molubo to Eeya wau momuji mola odudaa̒ lo Eeya.

¹⁰ Sababu Eeya tamolotolo boli buheli daa̒ wau helohutu totoonulalo u moo̒linggolabu, bo Eeyaalo Allahu Taa̒ala.

¹¹ Poo̒laata mai kahandaki lo Eeya ode watotia, yaa Eeya, alihu watotia modudua̒ wolo tatapu wau molotolo hilao; powaliyalo mai watotia saale wolo lealeaatu lohilao.

¹² Watotia mosukuru mola to Eeya wolo lealeaatu lohilaa lowatotia, yaa Eeya Allahu Taa̒ala lowatotia; watotia ohilaa momuji mola odudaa̒ lo Eeya ohiheo-hiheolo mao̒.

¹³ Sababu Eeya debo momonu olo watotia wolo ponu u udaa̒; Eeya malo lopatai nyawa lowatotia lonto huango kuuburu.

¹⁴ Yaa Allahu Taa̒ala, taa sombongi tilimihulo loluhu olo watotia, ngopo woomboa taa diila omanusia ohilaa momate olo watotia mate-mateelo mao̒; timongolio diila momandungi to Eeya.

¹⁵ Bo Eeya, yaa Eeya, Allahu Taa̒ala tamoomonua, wau tao̒odehu hilao, sabali, lealeaatu loponu wau tatapu molotolo hilao.

¹⁶ Poo̒tuotilo wau ponualo mai watotia, poo̒olotolalo wau poa̒ahuwalo mai watotia, sababu debo odelo tiilo lowatotia, watotia olo taa̒aluku wau hurumati to Eeya.

¹⁷ Wohiyalo mai watotia tuoto lo opopiohu Eeya, yaa Eeya, alihu taa u molonuo̒ olo watotia mowali moolito, wonu timongolio moo̒onto to Eeya motulungi wau moliyango mai olo watotia.