JABURU 85 - KITABI HABARI MOPIOHE

Dua̒ duo̒lo osalaamati lo bangusa

¹ Duo̒lo diriheni lopolemboa̒ tamoolahua. Jaburu lokaumu Korah.

² Eeya motuhatawa tohuta lo Eeya, yaa Eeya, owowoluwoa lo Isirai̒lu mapilo ponguli lo Eeya.

³ Eeya malo ngambungu mai duduu-sawaalo umati lo Eeya; hemilaa̒apu lo Eeya totoonulalo totalaalio.

⁴ Timongolio diilalo milulukai lo Eeya; muluka lo Eeya u moo̒tihela hapato luli hilama lo Eeya.

⁵ Ponguliyalo mai mongowatotia, yaa Allahu Taa̒ala tamoo-poa̒ahua olo mongowatotia, diilalo mao̒ pomuluka to mongowatotia.

⁶ Wolo u ohiheolo mao̒ Eeya momuluka to mongowatotia, wau debo momuluka wawaalia mola?

⁷ Muli poo̒olotolalo mai mongowatotia alihu mongowatotia umati lo Eeya motiwengahe mola sababu polotulungi lo Eeya.

⁸ Pobilohelo mai deu̒ Eeya debo momonu, yaa Eeya, wohiyalo mai mongowatotia osalaamati monto Eeya.

⁹ Watia ohilaa modungohe tahuda lo Eeya Allahu Taa̒ala; Eeya lodanti mai osalaamati to olanto, umati-Lio, asali ito diilalo mohutu dusa.

¹⁰ Otutu, Eeya dapadapato mopoa̒ahu mai taa u saale, Allahu Taa̒ala tau̒daa̒ mamo tipoo̒yo to lipunto.

¹¹ Tolia̒ngo wau otatapu boli olootolo hilao mamo dunggaya, ua̒adili wau dame mamo oo̒o-oode.

¹² Otatapu wau olootolo hilao lomanusia matumoodu monto dunia, wau ua̒adili lo Allahu Taa̒ala motitulo mai monto hulungo.

¹³ Eeya mongohi mai u mopiohu, yi hutaanto mamongohi tilapulio.

¹⁴ Ua̒adili mameimulo mai wolo Eeya, wau mopodapato dalalo ode Eeya.