JABURU 81 - KITABI HABARI MOPIOHE

Lahu tou̒ rameyangi

¹ Duo̒lo diriheni lopolemboa̒ tamoolahua. Lodudua̒a lahu: Gitit. Lonto olei Asap.

² Polahualo mola puji poloi̒laalo momuji ode Allahu Taa̒ala, olootolonto, potingalao̒lo mola wolo wengahu ode Allahu Taa̒ala lei Yako.

³ Potingohelo mola rabana, pomintao̒lo mola lahu, pokutilo gaambusi wau kocapi wolo moonungo.

⁴ Pohiipolo mola torompeti todulahu bukaanto, to potihunggu hulala bohu wau hulalo purunama.

⁵ Sababu sua̒li boito tuwaulio lo wuu̒du to Isirai̒lu, tuwaulio lo palenta lonto Allahu Taa̒ala lei Yako.

⁶ Eeya lopowali mao̒ putuusani tuwau ode bangusa lo Isirai̒lu, tou̒ Eeya lomaju loluwali Masiri. Ilodungohe-U̒ bahasa udiila otaawamu,

⁷ “Wau̒ malo mintaa̒a banta lonto binggungumu, wau lolopata kalanji podetoheela lonto uluu̒mu.

⁸ To delomo osuusamu timongoli hipo ngiibode, wau Wau̒ lopoa̒ahu mai olimongoli. Tilameta-U̒ mai timongoli lonto bulonggodu tambati pilo tituua̒a-U̒, tilesi-U̒ mai timongoli tobutu lotaluhu Meriba.

⁹ Dungohilo upilopo eelaa-U̒ mai, wuu umati-U̒, Isirai̒lu, humayaalio timongoli ohilaa modungohe ola-U̒!

¹⁰ Diila mao̒ woluo to wolotamu ila wewo, diila mao̒ polubo ila deli.

¹¹ Wau̒lo Eeya Allahu Taa̒ala limongoli, tahe lodelo olimongoli yulumualai lonto Masiri. Tou̒ timongoli hipolaanga timongolio yilohiya-U̒ ua̒alo.

¹² Bo umati-U̒ diila lohuto lodungohe ola-U̒, Isirai̒lu diila lohuto lodungohe to ola-U̒.

¹³ Sababu uito piloluli-U̒ timongolio helo tibaaa̒ngi; huliilo mao̒ timongolio modudua̒ u otohilaa limongolio lohihilao.

¹⁴ Aa, humayaalio umati-U̒ ohilaa modungohe ola-U̒, humayaalio timongolio ohilaa modungohe to ola-U̒,

¹⁵ yi Wau̒ hua̒a mopo taa̒aluku mai musu limongolio, wau mopoo̒laaheo̒ ngoa̒amila laawani limongolio.

¹⁶ Taa u molonuo̒ ola-U̒ mapo taa̒alukuwo-U̒, timongolio mahukuu-maniyo-U̒ u ohiheo-hiheolo mao̒.

¹⁷ Bo umati-U̒ mawohiya-U̒ ua̒alo pale u tilulaoto, wau pobutuhu-U̒ wolo hula lotiia̒ lo oa̒ayua.”