JABURU 80 - KITABI HABARI MOPIOHE

Dua̒ duo̒lo osalaamati lo umati

¹ Duo̒lo diriheni lopolemboa̒ tamoolahua. Lodudua̒a lahu: Bunga baakungi. Jaburu lei Asap.

² Yaa Diiti lo Isirai̒lu, dungohilo mao, Eeya talo titau̒wa towali mai lei Yusu odelo ngopoa̒mbua tau. Eeya u totambati huhuloa̒ li olongia toitaato malaikati opolipio̒, podiambongolo momaju ode talu wolo motinelo laba-labaalo mobaango

³ totalu lei Epraim, Benyamin wau Manasye. Pobilohelo mai okokawasa lo Eeya ode lamiaatia, wau podunggalo mai mopoa̒ahu olamiaatia.

⁴ Yaa Allahu Taa̒ala, ponguliyalo mai mongowatotia; biloheelo mai mongowatotia wolo muura lohilao, yi mongowatotia mamoa̒ahu.

⁵ Yaa Eeya Allahu Taa̒ala Taa Laba-labaalo kawasa, tunggula omolua Eeya momuluka, eleponu umati lo Eeya hemodua̒ mola?

⁶ Yilohia lo Eeya to mongowatotia hiyongo u lowali ua̒alo, ponu dadaata daa̒ u lowali minumani.

⁷ Piloluli lo Eeya babaa-ngusawalo to tiheede helohaamawa tomimbihu huta lo mongowatotia wau mumuu-suuwaalo mongowatotia heloi̒ii̒ hisanangia.

⁸ Yaa Allahu Taa̒ala Taa Laba-labaalo kawasa, ponguliyalo mai mongowatotia; bilohilo mai mongowatotia wolo muura lohilao, alihu mongowatotia moa̒ahu.

⁹ Umati lo Eeya debo odelo bungo lo angguru u yilimbatai lo Eeya lonto Masiri. Babaa-ngusawalo wewo pilolontulo Eeya, lapatao̒ pilomulo lo Eeya bungo boito tolipu limongolio.

¹⁰ Eeya lopodapato huta olio; yi tio ilowaa̒ato lodelo-delomolo mola wau bua̒bua̒du ode ngoilanggubu lipu.

¹¹ Tio loo̒ wolungao̒ huhuu-luduwaalo, wau wolo tataangolio helo henggube bubuu-ngowaalo ayu arasi udaa̒ tutu.

¹² Walao̒ tangolio lotiwudu demola Lau Tenga, wowoohutio demola Dutulaa Eperat.

¹³ Yaa Allahu Taa̒ala, yilongola yiloohubu lo Eeya balalio, tilinggula timii̒du taa u lumaodeo̒ moo̒tipu hungolio?

¹⁴ Boi lo oa̒ayua helo ngeketa olio tunggula loruusa, wau binatangi tohuta datahu u luasi yilonga olio.

¹⁵ Yaa Allahu Taa̒ala Taa Laba-labaalo kawasa, muli podunggalo mai, bilohilo monto sologa wau poo̒tuotilo mai umati lo Eeya.

¹⁶ Poa̒ahuwalo umati tadebo odelo bungo lo angguru mapilomulo lo Eeya lohihilao, wau tumbuo̒ angguru u pilopowali lo Eeya lotoheto mola.

¹⁷ Musu malo luwode wau lolumbilao̒; huliilo mao̒ timongolio pobinasa mai lo omuluka lo Eeya.

¹⁸ Duo̒laalo taa u matilulaoto Eeya, walao̒ manusia tapiloo̒ lotolai lo Eeya ode Eeya.

¹⁹ Yi amiaatia diilalo mobale ode dalalo wewo monto Eeya; dahailo mai tutumulo lamiaatia, yi amiaatia mamomuji mola to Eeya.

²⁰ Yaa Eeya Allahu Taa̒ala Taa Laba-labaalo kawasa, ponguliyalo mai mongowatotia, bilohilo mai mongowatotia wolo muura lohilao, alihu mongowatotia moa̒ahu.