JABURU 8 - KITABI HABARI MOPIOHE

Odudaa̒ lo Allahu Taa̒ala wau ololamahu lomanusia

¹ Duo̒lo diriheni lopolemboa̒ tamoolahua. Lodudua̒a lahu Gitit. Jaburu lei Dauda.

² Yaa Eeya, Allahu Taa̒ala lo mongowatotia, kawasa lo Eeya masa-masaahuru to ngoilanggubu dunia! Odudaa̒ lo Eeya tamo tolokawasa hulungo

³ hepilolahu mola lo tau̒kekeei̒ wau tau̒nge. Pamalenta lo Eeya motoheto diila o eetua ulopo poo̒oyongao̒ musu wau laawani.

⁴ Wonu bilohe mola lo watotia hulungo u pilopowali lo Eeya, hulalo wau popoo-liyamaalo u pilopohuli lo Eeya,

⁵ tatoonu manusia boito, tilinggula ileela lo Eeya tio, tatoonu tio, tilinggula tilaala lo Eeya?

⁶ Bo piluduo̒ Eeya tio ngopee̒ motutuuwaua wolo Allahu Taa̒ala, wau milakuta lo Eeya tio wolo odudaa̒ wau ohurumati.

⁷ Yilohia lo Eeya tio kawasa to aalamu daa̒, ngoilanggubu u pilowali lo Eeya pilopo taa̒aluku lo Eeya to olio:

⁸ himba, sapi wau bibiahu ngoa̒amilalo, wau olo binatangi tohuta datahu wau luasi udiila tilolopani;

⁹ bubuu-lungiyalo wau totoo-lawaalo, ngoa̒amila mahaluku todelomo deheto.

¹⁰ Yaa Eeya, Eeya lo mongowatotia, odudaa̒ lo Eeya masa-masaahuru to ngoilanggubu dunia!