JABURU 79 - KITABI HABARI MOPIOHE

Dua̒ mei̒ lopato duo̒lo bangusa

¹ Jaburu lei Asap. Yaa Allahu Taa̒ala, bangusa tadiila motota to Eeya malo tibiluloa̒ tohuta pusaka lo Eeya. Timongolio helo ponajisi Bele lo Eeya, Yerusalemu pilopowali limongolio tuodu.

² Milate lomongo wato lo Eeya tilolaa limongolio lowali ua̒alo lo bubuu-lungiyalo to dulente. Milate lo tahe ilohilao lo Eeya piloluli limongolio lowali ua̒alo lo binatangi molinggelo.

³ To ngoilanggubu kota Yerusalemu duhu limongolio bolo hitolohelo mao̒ debo odelo taluhu; diaaluo tahe lolobungo olimongolio.

⁴ Amiaatia lowali hipohentea̒ lo babaa-ngusawalo totiheede, hipoi̒ii̒ya wau hepohentea̒ limongolio amiaatia.

⁵ Yaa Eeya, wolo u ohiheolo mao̒ Eeya momuluka, wau hiihia lo Eeya wali-walihuhu debo odelo tulu?

⁶ Tuwataalo mai omuluka lo Eeya ode yitaato babaa-ngusawalo tadiila motota to Eeya, wau ode yiyii-laidiyaalo udiila taa̒aluku wau hurumati to Eeya.

⁷ Sababu timongolio malopo binasa umati lo Eeya, wau helo ngaantulu tambati biluloa̒ limongolio.

⁸ Diila mao̒ hukuumania mai amiaatia sababu dusa loluuhuru lamiaatia. Hua̒a ponualo mai mongowatotia, sababu mongowatotia yilooli halaapani.

⁹ Tulungiyalo mai mongowatotia, yaa Allahu Taa̒ala tamoo-poa̒ahua to mongowatotia, ambungualo mai duduu-sawaalo mongowatotia wau lopataalo mongowatotia domi ohurumati lo Eeya lohihilao.

¹⁰ Diila mao̒ polulia bangusa wewo mohintu pasali lo mongowatotia, “Tou̒toonu Allahu Taa̒ala limongolio?” Poluliaalo mai mongowatotia moo̒onto polobaalasi to babaa-ngusawalo tahe lomate mongo wato lo Eeya yila-yilateelo mao̒.

¹¹ Dungohilo mai hiyongo lo tahi tawaloa; pohileaala dua̒ tau-tauwalo tahe tilantu mao̒ u mate luliaalo tumutumulo sababu kawasa lo Eeya.

¹² Yaa Eeya, tuliyalo mai babaa-ngusawalo boito poo̒opitu piu̒wa sababu ngoa̒amila polohina limongolio to Eeya.

¹³ Yi amiaatia umati lo Eeya, himba he himbalawa lo Eeya, mamosukuru mola to Eeya u ohiheo-hiheolo mao̒, wau momuji to Eeya wawaalia mola.