JABURU 73 - KITABI HABARI MOPIOHE

BUKU OTOLULIO JABURU 73–89 Oa̒adili lo Eeya

¹ Jaburu lei Asap. Otutu mopoiohu Allahu Taa̒ala duo̒lo umati-Lio, duo̒lo taa u ohilao mantali.

² Bo watia malolingu, oyakini lowatia bolo ngopee̒ yilooli,

³ sababu watia helo hiihia totaa sombongi, tou̒ watia loo̒onto ou̒untungi lotaa moleeto.

⁴ Sababu timongolio diila helo dutolo ngongoto, batanga limongolio molotolo wau seehati.

⁵ Timongolio diila helomanta suusa, diila ilodungga lo marapo debo odelo taa wewo.

⁶ Sababu uito timongolio opii̒li sombongi, wau laito hemohutu lou̒ diila omanusia.

⁷ Lonto hilaa limongolio lobangguwatai umoleeto; timongolio helokalaja u dadaata wolo raraa-njanawalo moleeto.

⁸ Timongolio hemo henteo̒ wau hemo loi̒loi̒ya, wau wolo sombongi hemo nganjamu mamodeehe.

⁹ Timongolio hemo tombulaa̒ Allahu Taa̒ala tosologa, wau hemolatabu totau-tauwalo todunia,

¹⁰ tilinggula umati lo Allahu Taa̒ala olo helobale toli mongolio, wau yakini toloi̒ya limongolio.

¹¹ Uali mongolio, “Allahu Taa̒ala diila motota, Taa Laba-labaalo molanggato diila mongalati.”

¹² Odi-oditolo mola owowoluwoa lotaa moleeto; tutumulio duo̒duo̒oto, halataalio he oduhenga mola tulusi.

¹³ Diila ohuna wambai̒o watia modaha hilaau̒ belesi; diila ohunalio watia mohalahe todusa.

¹⁴ Sababu ngotupa lodulahu watia he odungga lo marapo; timii̒du dimodupo watia hesikisaalio.

¹⁵ Humayaalio watia moloi̒ya mai odito, watia mamo hiyanati to hilaide lomongo walau̒mu.

¹⁶ Bo tou̒ watia helo tolopani u mongalati mao̒, sua̒li boito mailaba totoolo to olaatia.

¹⁷ Pulitio watia tilumuwoto ode Bele lo Eeya, lapatao̒ malo ngalatilo mola watia pulitio lotaa hileeta.

¹⁸ Pilopo tambati lo Eeya timongolio to dalalo u modipulato, wau piloluli lo Eeya timongolio helodehu binasa.

¹⁹ To delomo ngoi̒nta lomato timongolio helo aantulu, malo odito moo̒tihela hapato pulitio limongolio.

²⁰ Debo odelo tohiilopo uilooli tou̒ dimodupo; tou̒ Eeya, tilimihulai, yaa Eeya, timongolio olo yilooli lomola.

²¹ Tou̒ watia helolaasa mola diila sanangi hilao wau hilaa lowatia debo odelo ilotuhia,

²² watia mohulodu wau diila mongalati, watia debo odelo binatangi totalu lo Eeya.

²³ Bo watia debo totili lo Eeya, Eeya helodihu uluu̒ lowatia olowala.

²⁴ Hedilelo lo Eeya watia wolo potua, wau de matolimoo lo Eeya watia wolo ohurumati.

²⁵ Tatoonu tamilikia lowatia tosologa ngopohia Eeya? Wewolio mao̒ lo Eeya diaaluo u ilohilaa lowatia todunia.

²⁶ Eleponu jiwa wau batanga lowatia mowali molulupuhu, Eeyaalo olootolo lowatia, yaa Allahu Taa̒ala; Eeyaalo tilolahepaalo u mililiki lowatia u ohiheo-hiheolo mao̒.

²⁷ Taa u mololaa to Eeya matopotala, hebilinaasa lo Eeya taa udiila tatapu wau molotolo hilao to Eeya.

²⁸ Bo olaatia otutu mopiohulo woluo totili lo Allahu Taa̒ala, Eeya Allahu Taa̒ala pilowali lowatia tambati potiduo̒la lowatia, alihu watia moo̒ pololade totoonulalo huhutu lo Eeya.