JABURU 71 - KITABI HABARI MOPIOHE

Dua̒ lotaa u mapanggola

¹ To Eeya watotia motiduo̒la, yaa Eeya, diila mao̒ polulia mai watotia poo̒olitolio.

² Lopataalo mai watotia, sababu Eeya aadili, dungohilo wau poa̒ahuwalo mai watotia.

³ Powaliilo duo̒lo watotia odelo hui̒dee botu tambati potibiluloa̒ lowatotia, u gaambangi o aata lowatotia laito. Sababu Eeya malolantu mai u mopoa̒ahu olo watotia, Eeyaalo tambati potiduo̒la wau potiwolungo lowatotia.

⁴ Yaa Allahu Taa̒ala lowatotia, lopataalo mai watotia monto taa moleeto, monto kawasa lotau-tauwalo tadiila omanusia wau hiparangia.

⁵ Sababu Eeyaalo halaapani lowatotia, yaa Eeya, yaa Eeya, watotia yakini to Eeya tumulalo mai watotia donggo humula.

⁶ Ngotilonggadu tutumulo watotia, watotia hemo tiwunela to Eeya; Eeya helo duo̒lai olo watotia anggadu watotia pilotutu mai yi watotia laito hemomuji mola to Eeya.

⁷ Tutumulo watotia lowali ilobayawa lotaa dadaata, sababu Eeyaalo tamoo-duo̒lawa olo watotia tamolotolo.

⁸ Watotia laito hemomuji mola to Eeya, ilo-ilolaanga hepololadu lowatotia odudaa̒ lo Eeya.

⁹ Diila mao̒ tapila lo Eeya watotia tomasa watotia panggola mola diila mao̒ tolai watotia wonu lotolo watotia malo pulito,

¹⁰ sababu mumuu-suuwaalo watotia hemobisala olo watotia, tau-tauwalo tao̒hilaa momate-mateelo mao̒ olo watotia helo woomboa.

¹¹ Uali mongolio, “Tio matilolaa lo Allahu Taa̒ala; dulo ito mohilapita wau moheu̒upa olio, sababu diaaluo tamo poa̒ahu olio.”

¹² Diila mao̒ Eeya polamingo monto watotia, yaa Allahu Taa̒ala, yaa Allahu Taa̒ala lowatotia, hua̒a tulungia mai watotia.

¹³ Poluliaalo mao̒ taa u hemoluhu olo watotia poo̒olitolio wau poo̒pulitolo. Poluliaalo mao̒ taa u ohilaa mopo topotala olo watotia hilingua wau yilanggube lo ohiihina.

¹⁴ Bo watotia laito hemo tiwunela to Eeya, wau helebe dadaata mao̒ momuji mola to Eeya.

¹⁵ Ngotupa lodulahu mawunggulio lowatotia totoonulalo huhutu lo Eeya ua̒adili, wau oa̒ahu monto Eeya u diilalo oyia̒apa.

¹⁶ Pujio mola lo watotia huhutu lo Eeya tamolotolo boli buheli daa̒, yaa Eeya Allahu Taa̒ala, pamasahuruo lowatotia oa̒adili lo Eeya, bo oa̒adili lo Eeya wambao̒.

¹⁷ Yaa Allahu Taa̒ala, Eeya helo poo̒laatai olo watotia anggadu watotia donggo humula mai, tunggula botia hewunggulio lowatotia huhutu lo Eeya u moo̒linggolabu.

¹⁸ Yaa Allahu Taa̒ala, diila mao̒ tolai watotia, tunggula watotia panggola wau ouwaalo, alihu watotia mopololadu kawasa wau olootolo boli obuheli daa̒ lo Eeya to ngoa̒amila wali mola u madungga-dungga mai.

¹⁹ Yaa Allahu Taa̒ala, oa̒adili lo Eeya ngoilanggato hulungo; odito udaa̒alio totoonulalo huhutu lo Eeya; yi tatoonu tamoo̒ baaya to Eeya?

²⁰ Eeya helongohi mai olo watotia polodutolo dadaata u mobuheeto, bo Eeya mamo ponguli mai lotolo watotia wau muli mopotumulai watotia monto kuubulu.

²¹ Eeya mamohutu mai olo watotia lebe huru-hurumati, wau muli moliyango olo watotia.

²² Watotia ohilaa momuji mola to Eeya wolo gaambusi, sababu Eeya tatapu wau molotolo hilao, yaa Allahu Taa̒ala lo watotia. Watotia ohilaa mopolahu mola poloi̒laalo momuji ode Eeya wolo kocapi, yaa Allahu Taa̒ala tamantali lo Isirai̒lu.

²³ Watotia motingalaa̒ wolo polupolu lo wengahu, sambelo mopolahu mola poloi̒laalo momuji ode Eeya. Jiwa wau batanga lowatotia mopolahu mola wolo wengahu, sababu Eeya malo poa̒ahu mai olo watotia.

²⁴ Ngotupa lodulahu mapo loladu lowatotia oa̒adili lo Eeya, sababu tau-tauwalo tao̒hilaa mopo topotala olo watotia mai̒lolaahe wau piloo̒olito.