JABURU 7 - KITABI HABARI MOPIOHE

Dua̒ lomolohone ua̒adili

¹ Hiyongo wolo lapali lei Dauda, u pilopolahu mola ode Eeya sababu tei Kus taulo Benyamin boito.

² Yaa Eeya Allahu Taa̒ala lowatotia, watotia motiduo̒la to Eeya; poa̒ahuwalo wau lopatalo mai watotia monto ngoa̒amila taa u hemohenela olo watotia.

³ Diila mao̒ polulia timongolio debo odelo singa modangapo wau modedea̒ olo watotia wau diaaa̒ polotulungi ode watotia.

^4-5 Yaa Eeya Allahu Taa̒ala lo watotia, humayaalio watotia helohutu udiila juujulu, helohutu u moleeto to sahabati, meaalo heloo̒ luhi laawani lou̒ diila o alaasani, humayaalio watotia helohutu u odito,

⁶ poluliaalo mai watotia yilapita wau wau̒po lomusu, tulusi pateelio mate-mateelo mao̒ wau tolaalio tohuta.

⁷ Tihuloolo mai todelomo omuluka lo Eeya, yaa Eeya, tuwaliyalo luhu wolo majanunu lo mumuu-suuwaalo watotia. Tihuloolo mai u motulungi olo watotia, sababu Eeya mohile wolo moo̒ohuu̒ ua̒adili.

⁸ Ambuwalo babaa-ngusawalo to palito Eeya, wau kawasaailo timongolio monto tambati huhuloa̒ lo Eeya to sologa.

⁹ Eeya momutoo̒ umati lo manusia; wohiyalo mai watotia ua̒adili, yaa Eeya, sababu watotia diila ototala.

¹⁰ Pohuheliyalo mai ololeeto lotaa hemomaahu parenta wau poo̒lotolaalo mai hilaa lotaa mopiohu, sababu Eeya Allahu Taa̒ala taa̒adili, tamoo̒ tonea̒ hilaa wau pikiilangi lomanusia.

¹¹ Tamooduo̒lawa to watotia yito Allahu Taa̒ala tamopoa̒ahu taa u tuulusi lohilao.

¹² Allahu Taa̒ala yito hakimu taa̒adili, utimii̒du saaa̒ti mohukuumani mai taa moleeto.

^13-14 Wonu pii̒li limongolio diila mobolio̒, Eeya dapadapato wolo tingolo u moo̒pate. Eeya modumbata wami-Lio wau momua̒deo̒ buuti-I̒o, lapatao̒ mopomantahu paapaa-naa-Lio u otulu.

¹⁵ Bilohilo, taa moleeto hemo ranjana u moleeto; tio mohutu ranjana u moleeto wau hemo himbulo.

¹⁶ Tio mongau̒de huango ode taa wewo, bo tio lohihilao lodehu mola ode delomio.

¹⁷ Oditolio tio hilukuumani lo ololeetio lohihilao wau silikisaa lo oparangilio lohihilao.

¹⁸ Watotia mosukuru mola to Eeya sababu Eeya aadili, polahua mola lo watotia lahu poloi̒laalo momuji ode Eeya, Taa Laba-labaalo molanggato.