JABURU 59 - KITABI HABARI MOPIOHE

Dua̒ mei̒ duo̒lai

¹ Duo̒lo diriheni lopolemboa̒ tamoolahua. Lodudua̒a lahu: Diila mao̒ pobinasawa. Jaburu lonto olei Dauda, tou̒ tei Saulu lopoa̒hu tau helo ngimato belelio u momate olio mate-mateelo mao̒.

² Yaa Allahu Taa̒ala lo watotia, poa̒ahuwalo mai watotia monto mumuu-suwaalo watotia, duo̒la mai watotia totaa u moluhu olo watotia.

³ Lopatalo mai watotia monto taa u hipohutua u moleeto, poa̒ahuwalo mai watotia monto tahi pomatea mate-mateelo mao̒.

⁴ Bilohi, timongolio, hemolanggu ohilaa momate olo watotia mate-mateelo mao̒, tau-tauwalo diila omanusia helo panggala moluwali olo watotia; lebe-lebe pomao̒ diila kalana watotia malohutu dusa meaalo helohutu totala, yaa Eeya.

⁵ Diila olo kalana totala lowatotia, timongolio hitame-tamea̒ wau helo tidapa-dapato.

⁶ Tihuloolo mai, Allahu Taa̒ala Taa Laba-labaalo molanggato, tuulungia mai watotia. Yaa Allahu Taa̒ala lo Isirai̒lu, sakusiyalo mai lohihilao. Pobongulo mai wau hukuu-maniyalo babaa-ngusawalo, diila mao̒ ponua taa moleeto wau tamoo-hiyanatia.

⁷ Tou̒ lolaango timongolio muli mohualingo, henge-hengeto monahutu daa̒ debo odelo apula sambela hemohelili kota.

⁸ Timongolio tulusi hemohenteo̒ wau hemohina; loi̒ya limongolio molalito debo odelo wamilo, timongolio hemo lantobu diaaluo tamoo̒ dungohu.

⁹ Bo Eeya heloi̒ii̒ olimongolio, yaa Eeya, ngoa̒amila bangusa boito hilenteo̒ Eeya.

¹⁰ Eeyaalo olootolo watotia, watotia hemo tiwunela mola to Eeya, Eeya tambati poa̒ahuwalo batanga lowatotia, yaa Allahu Taa̒ala.

¹¹ Sababu opopiohu lo Eeya Allahu Taa̒ala lowatotia dungga-dungga mai ode watotia, Eeya lopoluli mai olo watotia loo̒onto musu lowatotia ilolaahe.

¹² Diila mao̒ patea timongolio mate-mateelo mao̒, yaa Eeya, alihu bangusa lowatotia diila mao̒ molipato. Pobubuu-alaalo mao̒ wau poo̒laahelo timongolio wolo kawasa lo Eeya, yaa Eeya tamoo-duo̒lawa to olamiaatia.

¹³ Sababu timongolio ilodusa wolo loi̒ya limongolio; poluliaalo mao̒ timongolio otaala lo osombongi limongolio, sababu timongolio ohilaa molaa̒nati wau mohimbulo.

¹⁴ Pobinasaalo timongolio todelomo omuluka lo Eeya, yaa Allahu Taa̒ala, pobinasaalo timongolio tunggula mopulito. Yi timii̒du tau mamotota mao̒ deu̒ Allahu Taa̒ala hemo malenta Isirai̒lu, wau pamalentaa-Lio moloo̒po to ngoilanggubu dunia.

¹⁵ Tou̒ lolaango timongolio muli mohualingo, henge-hengeto monahutu daa̒ debo odelo apula sambela hemohelili kota.

¹⁶ Timongolio monao̒ ode utoonulalo mao̒ mololohe ua̒alo, wau moheuwongo daa̒ wonu diila mobutuhu.

¹⁷ Bo watotia mopolahu mola pasali lo olootolo Eeya; timii̒du dimodupo watotia mopolahu mola wolo moo̒ohuu̒ pasali lo ponu wau otatapu wau olootolo hilaa lo Eeya. Sababu Eeyaalo tambati poa̒ahuwalo batanga lowatotia, tambati potiwunela lowatotia tou̒ suusa.

¹⁸ Yaa Allahu Taa̒ala, olootolo watotia, popolahua mola lowatotia puji poloi̒laalo momuji ode Eeya, sababu Eeyaalo tambati potiwunela lowatotia Yaa Allahu Taa̒ala, ilohilaa lowatotia.