JABURU 57 - KITABI HABARI MOPIOHE

Dua̒ mei̒ tuulungi

¹ Duo̒lo diriheni lopolemboa̒ tamoolahua. Lodudua̒a lahu: Diila mao̒ pobinasaawa. Jaburu lei Dauda, tou̒ tio tilumetea̒ ode delomo gowa u lopoo̒ lamingo batanga lonto olei Saulu.

² Ponualo mai watotia, yaa Allahu Taa̒ala, ponualo mai watotia, sababu bo to Eeyaalo watotia motiduo̒la. To delomo walungo polipio̒ Eeya watotia motituuo̒, tunggula dutalo daa̒ u moluhu walo majanunu mohuheli.

³ Watia longiibode mola to Allahu Taa̒ala Taa Laba-labaalo molanggato, to Allahu Taa̒ala talo kalaja mai olaatia.

⁴ Lonto sologa Eeya lolametai wau lopoa̒ahu mai olaatia; Eeya lopoo̒laaheo̒ tau-tauwalo tahi podeehea olaatia. Allahu Taa̒ala mamopo ilaalo deu̒ Eeya tatapu wau molotolo hilao olaatia, wau laito momonu olaatia.

⁵ Watotia hebilaala lomusu, timongolio debo odelo singa moongala manusia. Dungiti mongolio debo odelo totobuo̒ wau pana, dila limongolio debo odelo wamilo u molalito.

⁶ Yaa Allahu Taa̒ala, pobiloheelo mai odudaa̒ lo Eeya to hulungo, wau omumulia lo Eeya to ngoilanggubu dunia.

⁷ Musu lowatotia helo laalao̒ taalo olo watotia, wau helomoli sumangati lowatotia. Timongolio helo ngalia̒a huango todatalo lowatia, bo timongolio lohihilao lodehu ode delomio.

⁸ Watotia yakini wolo hilaa molotolo, yaa Allahu Taa̒ala watotia yakini wolo hilaa molotolo, watotia ohilaa mopolahu mola wau momuji to Eeya.

⁹ Wuu, pobongulo, jiwau̒! Wuu pobongulo, gaambusi wau kocapi! Watotia ohilaa mopobongu dulahe mamobutu mai.

¹⁰ Yaa Eeya watotia ohilaa mosukuru mola to Eeya to wolota lo babaa-ngusawalo. Otohilaa lo watotia mopolahu mola poloi̒laalo momuji ode Eeya to wolota umati lo manusia.

¹¹ Sababu ponu lo Eeya udaa̒ demola hulungo, wau otatapu wau olootolo hilaa lo Eeya demola hehee-ngoowaalo.

¹² Yaa Allahu Taa̒ala, pobiloheelo mai odudaa̒ lo Eeya to hulungo, wau omumulia lo Eeya to ngoilanggubu dunia.