JABURU 55 - KITABI HABARI MOPIOHE

Dua̒ mei̒ duo̒lai tomusu

¹ Duo̒lo diriheni lopolemboa̒ tamoolahua. Wolo yitohu kocapi. Lahu pongaajali lei Dauda.

² Yaa Allahu Taa̒ala, dungohilo mai dua̒ lowatotia, diila mao̒ pomalingo monto polohone lowatotia.

³ Poo̒tuotilo watotia wau tametilo mai watotia, watotia loa̒antulu sababu osuusa lowatotia.

⁴ Hilaa lo watotia balisa sababu ilaanjamu lomusu wau hedilehe lotaa moleeto. Sababu timongolio helo posuusa tutumulo watotia, wau wolo nahutu helomusu olo watotia.

⁵ Hilaa lowatotia balisa daa̒, sababu mautu u moo̒tiheela hapato heloo̒ sababu watotia yiloohe.

⁶ Watotia yilanggube lo oluluhela wau diluito moohe, wau dilihuma daa̒-daa̒alo mao̒ lo pongolaasa moo̒tihela hapato.

⁷ Aa, humayaalio watotia opolipio̒ debo odelo poombo, matumomboto mololohe tambati u aamani.

⁸ Ooo̒, matumomboto molaminga daa̒, wau motipoo̒oyo tohuta datahu wau luasi udelita.

⁹ Watotia mahua̒a mololohe tambati potiduo̒lalo monto dutalo daa̒ wau dupoto huloyongo.

¹⁰ Yaa Eeya, polilii-nguwalo mai mumuu-suuwaalo lo watotia, popuuyotalo mai biisalawa limongolio, sababu tokota iloontonga lowatotia oparangi wau tahi poloohulua.

¹¹ Hui wau dulahu timongolio hemohelili, hipohutua u moleeto wau hemopo toodei puuyota.

¹² To utoonulalo mao̒ woluo poloa̒antulu; polodeehe wau polo wimbulo helahutu totoonulalo ototohilaa lohilao to paatali.

¹³ Humayaalio bo musu tahemo hentea̒ olau̒, wau̒ donggo mao̒ taahangi. Humayaalio bo laawani tahemohina olau̒, wau̒ donggo mowali motituuo̒ monto olio.

¹⁴ Bo tumbao̒ yio̒, tamaniu̒, sahaabatiu̒, sahaabati modudula wolau̒ tahemo hiyanati olau̒.

¹⁵ Muloololi mai ito wawaahea̒ wolo mopiohu hale, wau biaasa hemo ibaadati pee̒-pee̒enta to Bele lo Eeya.

¹⁶ Huliilo mao̒ musuuu̒ mate tumahuo̒olo mola wau hitumula motuhuta mola ode dunia lotaa mate, sababu u moleeto woluo tobele limongolio, tohuungi mongolio.

¹⁷ Bo wau̒ mongiibode mola to Allahu Taa̒ala, Eeya mamo poa̒ahu mai olau̒.

¹⁸ Hui wau dulahu wau̒ hemohile wolo moo̒ohuu̒ wau hilumoyongo, wau Eeya lodungohei sualaau̒.

¹⁹ Eeya lopoa̒ahu mai olau̒ hetiluhu lomusu, u lotutuuyuta dadaata daa̒ helo luwali olau̒.

²⁰ Allahu Taa̒ala tahe momalenta monto ohiheo-hiheolo mao̒ mamo dungohei olau̒ wau mopoo̒laahe olimongolio. Sababu timongolio diila mohuto molilihu, wau diila moohe to Allahu Taa̒ala.

²¹ Bakasi lo sahaabatiu̒ heloluhu mongo sahaabatilio, tio lolambanga dantilio.

²² Tataahelio moa̒luti molaasa laba-labaalo suukali, bo todelomo hilaalio o lonuo̒. Bisalaalio mopiohe hilao, bo moluhia̒a debo odelo wamilo u molalito.

²³ Wuduwalo mola ololawalumu ode Eeya, yi Eeya mamotulungi mai olemu; sababu taa juujulu diila poluli lo Eeya olaahelio.

²⁴ Bo Eeya, yaa Allahu Taa̒ala, mamopodehu mola olimongolio ode delomo huango modeloma daa̒. Tahi pohimbuloa wau tamoomatea mate-maatelo mao̒ diila tamoo̒oma mola ngotayadu umulu limongolio. Bo watotia yakini to Eeya.