JABURU 51 - KITABI HABARI MOPIOHE

Dua̒ Mei̒ ambungu

¹ Duo̒lo diriheni lopolemboa̒ tamoolahua. Jaburu kalaangani lei Dauda

² lapatao̒ tio dilini li Nabi Natan sababu helojina woli Batsyeba.

³ Ponualo mai watotia yaa Allahu Taa̒ala, sababu Eeya debo momonu, lulutaalo mai dusa lowatotia sababu odehu hilao lo Eeya u udaa̒.

⁴ Buboi̒lo mai totoonulalo ololeeto lowatotia; poberesiyalo mai watotia monto dusa lowatotia.

⁵ Sababu ilaaku lowatotia totoonulalo totala lowatotia, dusa lowatotia laito hee̒ela-eela mola lowatotia.

⁶ To Eeya, to Eeyaalo wambao̒ watotia ilodusa, wau hepilohutu lowatotia wolo u ilanggapu lo Eeya moleeto. Yi patutilio Eeya mohukuumani mai olo watotia, sababu aadili sama-samaata putuusani lo Eeya.

⁷ Tutuulio mao̒ tutu, watotia moleeto tumulalo pilotutulio mai, wau ilodusa tumulalo mai todelomo talomo.

⁸ Eeya hemohile wolo moo̒ohuu̒ otuulusi lohilao; poo̒poluwalo mai u hitua-tuawua uwoalu todelomo hilao lowatotia wolo hikimati lo Eeya.

⁹ Pomantaliyalo mai watotia, yi watotia mabelesi; wuloilo mai watotia, yi watotia malebe moputio̒ wolo pini.

¹⁰ Poluliaalo mai watotia modungohe habari moe̒engahu, alihu hilaa upilopo toyopu mai lo Eeya botie muli motingalaa̒ meengahu.

¹¹ Palingaalo mai baya lo Eeya monto duduu-sawaalo watotia, wau lulutaalo mai totoonulalo totala lowatotia.

¹² Powaliyalo mai hilaa u belesi ode wototia, yaa Allahu Taa̒ala, pobohuwalo mai u hitua-tuawua uwoluo todelomo hilao lowatotia wolo sumaangati u sabali.

¹³ Diila mao̒ tapila watotia monto talu lo Eeya, wau diila mao̒ hamaawa Rohu lo Eeya u mantali monto watotia.

¹⁴ Pohutuwalo mai watotia muli meengahu sababu oa̒ahu monto Eeya, wohiyalo mai watotia hilaa u iloheela lohilao u modunghe to Eeya.

¹⁵ Yi watotia mamopo aajali mao̒ palenta lo Eeya totaa odusa, alihu timongolio muli mohualingo ode Eeya.

¹⁶ Lopataalo mai watotia monto mautu, yaa Allahu Taa̒ala tamoo-poa̒ahua olo watotia, yi wolo weengahu mapololadu lowatotia ua̒adili lo Eeya.

¹⁷ Yaa Eeya, tulungia mai watotia mobisala, yi watotia mamomuji-muji mola to Eeya.

¹⁸ Eeya diila motuhatawa tobake tilambalo; humayaalio watotia mopodewo mola bake yilalango, Eeya diila motohilaa uito.

¹⁹ Bake ode Allahu Taa̒ala yito hilaa u motoyo-toyopuulo mao̒, hilaa u taa̒aluku wau molilihu diila potouli lo Eeya.

²⁰ Yaa Allahu Taa̒ala, pobilohelo mai opopiohu lo Eeya ode Sion, muli bongulaalo didii-ngingaalo meeseli lo Yerusalemu.

²¹ Yi Eeya mamo tuhatawa mololimo bake upaatuti, bake yilalango wau bake u wimu-wimumuto sapi ulai̒ mapobakelo toitaato mesba lo Eeya.