JABURU 49 - KITABI HABARI MOPIOHE

Diila ohuna mopomangga okokaya

¹ Jaburu lokaumu Korah. Duo̒lo diriheni lopolemboa̒ tamoolahua.

² Dungohilo, wuu totoonulalo bangusa, potaala mao̒ bulonga, wuu tuango dunia,

³ mopio taa biaasa, meaambo tahimuloa lo ulipu, mopio taa mosikini, meaambo taa kaya.

⁴ Wau̒ mamoloi̒ya mai tataa-heyaalo molinepo, hungo lo pikiilangiu̒ laba-labaalo delomo.

⁵ Wau̒ mamo poo̒tuotai lumadu, wau motombangai bolilio sambela mokuti kocapi.

⁶ Wau̒ diila moohe tou̒ oweepita tou̒ balaalio lomusu tamoleeto.

⁷ Timongolio yito hemo pomangga lo okokayaalio, wau hemo pobatingga halata upangolio.

⁸ Tutuulio tutu diaaluo penu boli ngotaa mao̒ tamoo̒ poa̒ahu wutatio, meaambo momaayali tolotio to Allahu Taa̒ala.

⁹ Penu boli u wohilio diila tamoo̒ tuheto; mahale daa̒ halaga u potoloto nyawalio,

¹⁰ alihu tio moo̒hei monto opopate wau mowali tumumula ohiheo-hiheolo mao̒.

¹¹ Diila, tio mamoo̒onto deu̒ penu boli taa molinepo debo mate. Taa abaloolo wau mohulodu pee̒-pee̒enta binasa, wau mololaa mao̒ halataalio ode taa wewo.

¹² Timongolio mamotitolaa to kuubulu ohiheo-hiheolo mao̒; ui-uitolo potibiluloa̒ limongolio u mololaalaaita, eleponu muloololio mai timongolio motolo miliki dadaata huta.

¹³ Manusia diila mowali tumumula tulusi todelomo totoonulalo u hitua-tuawua dadaata; debo odelo binatangi, tio olo debo mabinaasa.

¹⁴ Odi-odieelo mola paladu lotaa u hemopo mangga batangalio, wau dulahu momooli lotaa u ilolulia lohilao wolo loi̒yaalio.

¹⁵ Debo odelo himba, timongolio tilantulio u mate; mautu mamowali diiti limongolio. Didimodupo timongolio olaahe lotaa juujulu; batanga limongolio hua̒a mohutodu todunia lotaa mate, molamingo monto potibiluloa̒ u totoonulalo hitua-tuawua dadaata.

¹⁶ Bo Allahu Taa̒ala mamopo bebasi mai olau̒, Eeya mamolopatai olau̒ monto kawasa lomautu.

¹⁷ Diila mao̒ oohe wonu ngotaalio mowali kaya, wau halataalio oduhenga mola dadaata.

¹⁸ Sababu tou̒ mate mao̒ tio diila moo̒delo wolo-wolo, halataalio diila tamolaahe mola ode delomo kuubulu pee̒-pee̒enta wolio.

¹⁹ Tumbao̒ wonu bolo ngotaalio moo̒otoduo untungi todelomo tutumulio, wau hemomuji-muji sababu loo̒toduo mai hasiliilio,

²⁰ yi tio mamolunuhe mola oli nene moyaalio olo ode tambati u modio̒lomo u ohiheo-hiheolo mao̒.

²¹ Manusia diila mowali tumumulo tulusi todelomo woluo totoonulalo u hitua-tuawua dadaata, debo odelo binatangi, tio olo mabinaasa.