JABURU 48 - KITABI HABARI MOPIOHE

Sion, kota lo Allahu Taa̒ala

¹ Jaburu lokaumu Korah.

² Otutu udaa̒alo mola Eeya wau laba-labaalo ilopujia tokota lo Allahu Taa̒alanto, tohuludu u mantali.

³ Sion, huludu lo Allahu Taa̒ala oontonga lengge-lengge molanggata daa̒ wau molamahu kota li Olongia Daa̒ moe̒engahe to ngoilanggubu dunia.

⁴ Allahu Taa̒ala bilu biluloa̒ todelomo bibii-ntengilio, malo ilaalo Eeya lohihilaolo tamoo duo̒lawa olia.

⁵ Bilohilo, mongo olongia helo tia̒mbu; timongolio lonao̒ mai ohilaa moluhu.

⁶ Bo loo̒onto huludu boito, timongolio lolinggolabu; timongolio tilumehela hapato wau tilumeteo̒ hilingua.

⁷ Mola teto timongolio hilumehela yiloohe wau yilongongoto, debo odelo taabua tao̒hilaa mopotutu mai,

⁸ debo odelo kaapali u loa̒antulu todelomo dutalo.

⁹ Debo odelo u ilodngohento, botia oontonganto mao̒, to Kota lo Eeya Taa Laba-labaalo kawasa. Kota boito yito Kota lo Allahu Taa̒alanto, Eeya mopoduulua olio u ohiheo-hiheolo mao̒.

¹⁰ To delomo Bele lo Eeya amiaatia poo̒poo̒yo hemo mikiilangi mola ponu lo Eeya, yaa Allahu Taa̒ala.

¹¹ Tanggulo Eeya masa masaahuru wau hepujiolo to ngoilanggubu dunia, Eeya hemomalenta wolo aadili.

¹² Huliilo mao̒ ulipu lo Sion wau Yehuda motingalaa̒ meengahu, sababu Eeya helo hukuumani laawani limongolio.

¹³ Heliliyalo Sion, putariyalo tio, wau yia̒paalo monalaalio.

¹⁴ Poo̒tuotilo dingingo meeselilio, palakisailo biintengilio, alihu timongoli moo̒ wungguli mao̒ to waliimu mola:

¹⁵ “Eeyaalo Allahu Taa̒ala, Allahu Taa̒alanto u ohiheo-hiheolo mao̒, Eeya mamodelo olanto tunggula ohiheo-hiheolo mao̒.”