JABURU 47 - KITABI HABARI MOPIOHE

Allahu Taa̒ala Takaawasa Udaa̒

¹ Jaburu lokaumu Korah. Duo̒lo diriheni lopolemboa̒ tamoolahua.

² Polaa̒apolo mola uluu̒ wolo wengahu, wuu totoonulalo bangusa! Pujialo mola Allahu Taa̒ala wolo tingalaa̒ meengahu!

³ Sababu Eeya Taa Laba-labaalo molanggato yito moo̒tihela hapato, Olongia Udaa̒ tamongawasa ngoilanggubu dunia.

⁴ Eeya helongohi olanto u loo̒haama to babaa-ngusawalo, helo powali olanto takaawasa to susuu kuwaalo bangusa.

⁵ Eeya lolulaotai ode olanto huta pusakaanto, obobangga lobangusa tapilonu-Lio.

⁶ Allahu Taa̒ala malo botula mola ode tambati huhuloa̒ li olongia-Lio, tilunuhe lo tingalaa̒ weengahe wau tingohu torompeti.

⁷ Polahuwalo mola poloi̒laalo momuji ode Allahu Taa̒ala, polahuwalo mola poloi̒laalo momuji ode Olongiaanto!

⁸ Allahu Taa̒ala yito Olongia to ngoilanggubu dunia, pujialo mola Eeya wolo lahu polupolu lo moa̒aluti!

⁹ Allahu Taa̒ala hulohuloa̒ toitaato tambati huhuloa̒ li olongia-Lio u mantali; Eeya momalenta to babaa-ngusawalo.

¹⁰ Mongo tau̒wa lo babaa-ngusawalo helo paanggala odelo umati lo Allahu Taa̒ala tahepujaa lei Abraham. Sababu Allahu Taa̒ala yito Olongia lo totoonulalo olongia, Eeya laba-labaalo udaa̒ wau molamahu.