JABURU 46 - KITABI HABARI MOPIOHE

Allahu Taa̒ala pee̒-pee̒enta wau motulungi mai olanto

¹ Jaburu lokaumu Korah. Duo̒lo diriheni lopolemboa̒ tamoolahua. Wolo lahu Alamot.

² Allahu Taa̒ala yito tamoo-duo̒lawa wau olootolonto; Eeya laito dapadapato wau mambo motulungi mai todelomo oweepita.

³ Yi ito diila moohe, penu boli dunia molotau̒lo, huhuu-ideyaala lumodua̒a mola ode wamoo̒ deheto;

⁴ penu boli deheto moluhu wolo majanunu wau oliyoo̒ buo̒ola daa̒ ulaba-labaalo, wau huhuu-luduwaalo humuhela lo totai̒o mai.

⁵ Woluo tolohu dutulaa u moe̒engahe kota lo Allahu Taa̒ala, tambati potibiluloa̒ lo Allahu Taa̒ala Taa Laba-labaalo molanggato.

⁶ Allahu Taa̒ala bilubiluoa̒ mola teto, yi kota boito diila tabinaasa; Eeya mamo tulungi mao̒ tou̒ tinelo monto wela-welaama to hulungo mobutu mai.

⁷ Allahu Taa̒ala Moti bulonggodu, yi dunia moa̒antulu motoyopu; babaa-ngusawalo mogeegeri, yiyii-laidiyalo mololohubu.

⁸ Eeya Taa Laba-labaalo kawasa pee̒-pee̒enta wolanto, Allahu Taa̒ala lei Yako moduo̒lai olanto.

⁹ Dulo, bilohilo wolo u kilalaja mai lo Eeya; donggo boli moo̒linggolabu huhutuu-Lio to dunia!

¹⁰ Eeya helo pohuheli popaatea to ngoilanggubu dunia, buutio̒ wau totobuo̒ mooyoto he ilaantulu-Lio, popoo-risaiyaalo hihuululo hepilobu-Lio.

¹¹ Tahudaa-Lio, “Pohuheliyalo mopaatea; ototai mao̒, Wau̒ botie Allahu Taa̒ala, Wau̒ udaa̒ towolota lo babaa-ngusawalo, udaa̒ to ngoilanggubu dunia.”

¹² Eeya Taa Laba-labaalo kawasa pee̒-pee̒enta wolanto, Allahu Taa̒ala lei Yako moduo̒lai olanto.