JABURU 44 - KITABI HABARI MOPIOHE

Dua̒ mei̒ duo̒lai

¹ Jaburu lo kaumu Korah. Lahu lo pongaajali. Duo̒lo diriheni lopolemboa̒ tamoolahua.

² Yaa Allahu Taa̒ala, amiaatia malo dungohe lohihilao wungguli u yilungguli loluuhuru lamiaatia pasali lo huhutu polu-polutuo u hepilohutu lo Eeya to jamani muloololio mai.

³ Eeya lohihilao tahe lopolahi babaa-ngusawalo alihu umati lo Eeya motitatapu tolipu limongolio. Babaa-ngusawalo wewo hepilo topotala lo Eeya, bo umati lo Eeya pilopoluli lo Eeya helo manggango.

⁴ Huta boito diila yilahu limongolio wolo wamilo; diila wolo olootolo limongolio lohihilao timongolio heloo̒haama, bo wolo kawasa wau tinelo owoluo lo Eeya, sababu Eeya lotuhatawa to umati lo Eeya.

⁵ Eeyaalo Olongia lo watotia wau Allahu Taa̒ala lowatia, talongohi mai u loo̒haama to umati lo Eeya.

⁶ Wolo kawasa lo Eeya amiaatia helo poo̒laaheo̒ musu lamiaatia, wau helopo taa̒aluku tau-tauwalo tahi poluhua to olamiaatia.

⁷ Sababu watia diila helo pongaku pana lowatia, penu boli wamilo lowatia diila tamopoa̒ahu olaatia.

⁸ Bo Eeyaalo talo poa̒ahu olamiaatia lonto laawani, wau helo poo̒laaheo̒ tau-tauwalo tamolonuo̒ to olamiaatia.

⁹ Yi amiaatia malaito mopou̒daa̒ mola to Eeya, wau mololaalaaita mosukuru mola to Eeya.

¹⁰ Bo botia Eeya lololaa olamiaatia wau helo poluli mai olo mongowatotia ilolaahelio. Eeya diilalo lomaju pee̒-pee̒enta wolo baliisani lamiaatia.

¹¹ Piloluli mai lo Eeya mongowatotia lopolahi lo batanga lonto musu lo mongowatotia, wau timongolio helo lambata halata lo mongowatotia.

¹² Piloluli lo Eeya amiaatia tilambalolio debo odelo himba, wau hepilo bubuua̒lawa lo Eeya amiaatia towolota lo babaa-ngusawalo.

¹³ Pilotali lo Eeya umati lo Eeya wolo halaga udiila boti ohalaga, wau diila heloo̒tapu uuntungi wolo-wolo.

¹⁴ Pilowali lo Eeya amiaatia pilohentea̒ lomongo tiheede timongolio hipodali-dalilia wolo loi̒ya wau hipoi̒ii̒ya to olamiaatia.

¹⁵ Pilowali lo Eeya amiaatia hipodalilia lo babaa-ngusawalo; timongolio hitahalilia lo lunggongo sambela hemohina olamiaatia.

¹⁶ Ilo-ilolaanga watia hilentei̒o, helomanta woolito wau iloolia lobaya,

¹⁷ sababu loo̒dungohe henteo̒ wau polohina lonto tunggilo musu wau tamoo-niyatia.

¹⁸ Ngoa̒amila boito malolemba to olamiaatia penu boli amiaatia diila helo lipata to Eeya meaambo helo hiyanati daantia lo Eeya walamiaatia.

¹⁹ Hilaa lamiaatia diila helomaahe to Eeya; palenta lo Eeya diila he pilalongo lamiaatia.

²⁰ Bo tilolaa lo Eeya amiaatia todelomo u modio̒lomo; amiaatia diila o lotolo towolota lo binatangi mongantau.

²¹ Humayaalio amiaatia diilalo hemolubo to Allahu Taa̒ala, bo hemodua̒ to ila wewo,

²² tantu mao̒taawa lo Allahu Taa̒ala, sababu Eeya molonea̒ dilepuhe lohilaa lamiaatia.

²³ Domi Eeya amiaatia tulusi hea̒njamuo lomautu, wau pilohutulio debo odelo himba tilambalo.

²⁴ Pobongulo mai, yaa Eeya! Yilongola Eeya tuutuluhu? Tihuloolo mai! Diila mao̒ potoulia amiaatia u ohiheolo mao̒.

²⁵ Yilongola Eeya lotituuo̒, wau lolipatai dudutolo wau usuusa lamiaatia?

²⁶ Amiaatia lodehu loa̒antulu tohuta, leibalata todelomo peaahuo̒ sababu ilolaahelio.

²⁷ Tihuloolo wau podunggaalo mai motulungi olamiaatia, poa̒ahuwalo mai amiaatia sababu ponu lo Eeya.