JABURU 4 - KITABI HABARI MOPIOHE

Dua̒ hui

¹ Duo̒lo diriheni lopolemboa̒ tamoolahua. Wolo yiyitohe kocapi. Jaburu lei Dauda.

² Yaa Allahu Taa̒ala, Eeyaalo tamoodulua to waotita; ambunguolo tametilo mai watotia wonu watotia mongiibodu. Tou̒ watotia suusa, Eeya tahe lotulungi mai to watotia; botia ambunguolo ponualo mai watotia wau dungohilo dua̒ lowatotia.

³ Wuu tau-tauwalo, donggo ngoolo mola poli timongoli mohina to Allahu Taa̒ala lowatotia? Dilumutu omolua timongoli motolia̒nga udiila ohuna wau mohilapita udiila otutu?

⁴ Ototai mao̒, Eeya malo lulaotao̒ ode batanga-Lio ngotaalio tapilonu-Lio. Eeya helo dungohu wonu watotia mongiibode to Eeya.

⁵ Potihumuhelo lomola lou̒ moohe wau diilalo mao̒ pohutu dusa.

⁶ Podewowalo bake u otutu wau poyakinilo to Eeya.

⁷ Dadaata taa hipohintua, “Tatoonu tamaa mobalakati mai olanto?” Pohileaala dua̒ Eeya motuhatawa mai to mongowatotia, Yaa Eeya.

⁸ Eeya helohutu mai hilaa lowatotia lebe leengahe wolo taa u letaletao̒ sembolio.

⁹ Yi watotia lotibalato wau lotuluhu wolo aamani, sababu bo Eeyaalo, Eeya, talohutu mai tutumulo watotia aamani!