JABURU 39 - KITABI HABARI MOPIOHE

Polongakua lotaa udonggo dutodutolaa

¹ Duo̒lo diriheni lopolemboa̒ tamoolahua. Jaburu lei Dauda. Odelei Yudutun.

² To pikiilangiu̒ mola, “Wau̒ ohilaa modaha batanga alihu diila odusa wolo dilau̒. Wau̒ diila mohuto mobisala ngotilonggadu taa moleeto donggo meembidu.”

³ Wau̒ motipoo̒oyo wolo ngolihu bahasa tilinggula moluhi batangau̒ lohihilao. Wau polodutoluu̒ oraasawa helebe mobuheeta mola;

⁴ Wau̒ hekiluwaasa lo ololawalo ulaba-labaalo. Lebe hepikii-langiyolo yi helebe suusa mola hilaau̒; pulitio malo loi̒ya wau̒,

⁵ “Yaa Eeya, poo̒taalo mai omolua watotia mate alihu otaawa lowatotia malo odito limbuo̒ tutumulo watotia.”

⁶ Malo odito limbuo̒ tilantu mai lo Eeya umuru lowatotia! To Eeya eenggade lo tutumulo watotia diila oboliilio. Otutu, manusia debo odelo hiipo napasi wambai̒o,

⁷ tutumulio mopaluto debo odelo wolilu. Ngoa̒amila daatalio lo kalajaalio diila ohuna sama-samaata; tio mopohuntu daa̒ halata, bo diila otaawa tatoonu tamo pomake mao̒.

⁸ Botia wolo u yimaa mai lowatotia, yaa Eeya? To Eeyaalo potiwunela lowatotia.

⁹ Lopataalo mai watotia monto ngoa̒amila dusa lowatotia, diila mao̒ polulia watotia mowali hantia̒ lotaa abaloolo.

¹⁰ Watotia motipoo̒oyo wau diila momuo̒ tunggilo watotia, sababu Eeyaalo tahe lohumbadei olo watotia.

¹¹ Hamaalo mola hukuumani lo Eeya monto watotia, sababu watotia ngopee̒ yilate sababu yilumbade lo Eeya.

¹² Manusia sababu totalaalio; hilukuumani lo Eeya wau yilumbade lo Eeya debo odelo wale ilaantulu mai lo Eeya wolo u ohalaga to olio. Otutu, manusia debo odelo hiipo napasi wambai̒o.

¹³ Dungohilo mai dua̒ lo watotia yaa Eeya, poo̒tuotilo mai polohone lowatotia; diila mao̒ potipoo̒oyo wonu watotia humoyongo. Debo odelo ngoa̒amila nenemoya lowatotia bo ngopee̒ mola watotia motihangata to Eeya.

¹⁴ Diila mao̒ pomuyu olo watotia, alihu watotia sanangi ngoi̒di, tou̒ watotia diipo mate mao̒ wau madiduu̒.