JABURU 36 - KITABI HABARI MOPIOHE

Ololeeto manusia wau opopiohu lo Allahu Taa̒ala

¹ Duo̒lo diriheni lopolemboa̒ tamoolahua. Lonto olei Dauda, wato lo Eeya.

Ololeeto manusia

² Dusa hemobisala todelomo hilaa lotaa moleeto, tio sama-samaata diila moohe to Allahu Taa̒ala.

³ Tio monganggapu batangalio heebati tutu, tilinggula diila mongalati lo totalaalio, wau diila molonua̒ao̒.

⁴ Loi̒yaalio moleeto wau polupolu lo wimbulo hidala-dalaala, tio diilalo mohutu u mopiohu wau molinepo.

⁵ To tambati lo pootuluhe tio hemo ranjana u moleeto; huhutuulio diaaluo u mopiohu, u moleeto diila potoulilio.

Opopiohu lo Allahu Taa̒ala

⁶ Yaa Eeya, ponu lo Eeya debo odelo langgato hulungo, wau otatapu wau olootolo hilao lo Eeya demola heengo.

⁷ Opopiohu lo Eeya tilimimbulu molanggato debo odelo langgato hui̒du, wau oa̒adili lo Eeya debo odelo delomio lo auhe daa̒; manusia wau binatangi he tilaala lo Eeya, yaa Eeya.

⁸ Malo odito ohalaga ponu lo Eeya, yaa Allahu Taa̒ala, manusia motiduo̒la todelomo wolungo polipio̒ lo Eeya.

⁹ Timongolio olulia lohilao wolo ua̒alo laba-labaalo daata to Bele lo Eeya, wolo minumani monto dutulaa lo Eeya umopowali nyaamani.

¹⁰ Eeyaalo bungo tutumulo lo ngoa̒amila mahaluku, todelomo tinelo Eeya mongowatotia moo̒onto u mobaango.

¹¹ Pohileaala dua̒ Eeya debo momonu mai taa u motota to Eeya, wau mohutu mai mopiohe totaa u tuulusi lohilao.

¹² Diila mao̒ polulia watotia tuhuo lotaa soombongi, meaalo polahio lotaa moleeto.

¹³ Bilohilo mai, taa u hipohutua u moleeto malodehu, timongolio maleibanti wau diilalo loo̒ bongu.