JABURU 34 - KITABI HABARI MOPIOHE

Poloi̒laalo momuji to opopiohu lo Eeya

¹ Jaburu lei Dauda, tou̒ tio helo tia̒akali debo odelo tabiyongo totalu lei Abimelekh, tilinggula tio pilolontulo lapatao̒ lonao̒.

² Wau̒ ohilaa mosukuru mola to Eeya timii̒du wakutu, wau diila ohuhe-huheliilio momuji mola to Eeya.

³ Wau̒ ohilaa mopomangga-mangga batanga sababu huhutu lo Eeya; pohileaala dua̒ taa hideehea modungoheo̒ wau motiwengahu.

⁴ Pou̒daa̒alo mola Eeya pee̒-pee̒enta wolau̒, dulo pee̒-pee̒enta mopolamahu tanggu-Lio.

⁵ Wau̒ helodua̒ mola ode Eeya, wau Eeya lolametai, wau lopo lopato olau̒ lonto totoonulalo owowohe.

⁶ Taa hideehea helo tiwunela mola to Eeya wau lotiwengahu, timongolio diila o alaasani u mowali moolito.

⁷ Taa marapo hemo ngiibode wau Eeya lolametai olio, lopo lopato olio lonto totoonulalo ileepitalio.

⁸ Malai̒kati lo Eeya hemodaha taa usaale, wau helopo lopato olimongolio lonto baala.

⁹ Rasailo lohihilao donggo boli piohio Eeya, potisanangilo tutu taa u hemo tiwunela to Eeya.

¹⁰ Hurumatiaalo Eeya, wuu timongoli umati-Lio, sababu taa saale diila tao̒kuulangia.

¹¹ Penu boli sisii ngawaalo hipolaanga sababu kuulangi ua̒alo; bo taa u hemolubo to Eeya diila okuulangia.

¹² Dungohilo, wuu tau̒kekeei̒ ngoa̒amilalo, aajaliyou̒ timongoli mohurumati to Eeya.

¹³ Tingga mohuto timongoli o umulu hayahaya wau moo̒toduo u mopiohu?

¹⁴ Diila mao̒ pohulito tataa-heyaalo u moleeto, diila mao̒ potohilaa u siaasati wimbulo.

¹⁵ Poo̒lamingalo u moleeto, wau pohutua mao̒ u mopiohe, tolopaniyalo polodame wolo lealeaatu lotolo.

¹⁶ Eeya hemo poo̒tuotai taa saalea, Eeya modungohe wonu timongolio monguatio̒ mei̒ tuulungi.

¹⁷ Bo taa u hemohutu umoleeto tilehengia-Lio; wonu timongolio mate, timongolio hua̒a olipata.

¹⁸ Bo taa sale mongiibode, Eeya modungohei, wau mopoa̒ahu olimongolio monto totoonulalo ileepita.

¹⁹ Eeya membidu totaa u ohilaa kikiio̒; Eeya mopoa̒ahu taa u yilooli oboputu sumaangati.

²⁰ Dadaatalo mao̒ polodutolo lotaa mopiohe, bo Eeya molopata olio monto ngoa̒amilalo.

²¹ Batangalio debo hedahaa mai lo EEA, monto tulalio diaaluo penu boli tuwau mao̒ boliyolo.

²² Taa moleeto maamate sababu ololeetio, taa u molonuo̒ taa saale mamoo̒tapu hukuumani.

²³ Eeya mopoa̒ahu mongo wato-Lio; tamo tiwunela to Eeya diila tahukuu-maniyolo.