JABURU 26 - KITABI HABARI MOPIOHE

Dua̒ lo taa udiila ototala

¹ Jaburu lei Dauda. Wohiyalo mai ua̒adili watotia, yaa Eeya, sababu watotia tumutumulo wolo hilaa motulidu. Watotia hemoharapu mola to Eeya, wau diila helolingu penu boli ngi̒di mao̒.

² Tuleteaalo mai watotia, yaa Eeya, wau tesiyalo mai watotia, palakisailo mai ilohilaa wau pikiilangi lowatotia.

³ Watotia laito hemoe̒ela mola ponu lo Eeya, wau debo molotolo hilao to Eeya.

⁴ Watotia diila mohuto moa̒mbua wolo tamoo-himbuloa, meaalo moa̒awota wolo taa munaapiki.

⁵ Yilonuo̒ lowatotia aambua lotaa u hipohutua u moleeto, watotia helo halahu lonto kaumu hileeta.

⁶ Yiluloa lo watotia uluu̒ lo watotia tuotio diila ototala, wau lonao̒ helo helili tomesba lo Eeya, yaa Eeya,

⁷ sambela hemo polahu mola lahu sukuru, wau helo pololadu huhutu lo Eeya u moo̒linggolabu.

⁸ Ilohilaa lo watotia Bele lo Eeya, yaa Eeya, tambati piloti biluloa̒ lo Eeya wolo polupolu lo odudaa̒.

⁹ Diila mao̒ patea watotia mate-mateelo mao̒ wolo taa odusa, meaalo momahuta nyawa lo watotia pee̒-pee̒enta wolo tamoomatea mate-mateelo mao̒.

¹⁰ Timongolio mololaalaaita hemohutu u moleeto, wau laito dapadapato hemo lolimo sooloi̒.

¹¹ Bo watotia tumutumulo wolo hilaa motulidu, ponualo wau lopataalo mai watotia.

¹² Yi aa̒manilo mola watotia monto totoonulalo baala, watotia mamomuji mola Eeya todelomo aambua umati lo Eeya.