JABURU 25 - KITABI HABARI MOPIOHE

Dua̒ mei̒ potuhata wau mei̒ duo̒lai

¹ Jaburu lei Dauda. To Eeya, yaa Eeya, pobotulo mola lowatotia dua̒ lowatotia,

² yaa Allahu Taa̒ala lowatotia, watotia palacaya to Eeya! Diila mao̒ polulia mai watotia poo̒olitolio, wau hantia̒ lo mumuu-suuwaalo lowatotia.

³ Taa u mohiyanati to Eeya mapoo̒o-litolo, bo tayakini to Eeya diila tapo kikiio̒lo tohilao.

⁴ Pobilohelo mai kahandaki lo Eeya ode watotia, yaa Eeya, poi̒laalolo mai wolo u musi pohutuo lowatotia.

⁵ Ajaliyalo mai wau delowalo watotia u tumumulo modudua̒ kahandaki lo Eeya, sababu Eeyaalo Allahu Taa̒ala talo poa̒ahu olo watotia, watotia laito hemo haarapu mola to Eeya.

⁶ Eelailo mai opopiohu wau ponu lo Eeya, yaa Eeya, u hepilo ilaalo lo Eeya anggadu bohulio mai.

⁷ Ambungualo mai dusa wau totala tomaasa humula lowatotia, eelalilo mai watotia motuuu̒de wolo ponu wau opopiohu lo Eeya.

⁸ Sababu Eeya mopiohu wau aadili, Eeya helo poi̒laalo dalalo totaa u yilapalo.

⁹ Eeya helodelo taa u dupadupapa lohilao, wau helo ngaajali kahandaki lo Eeya olimongolio.

¹⁰ Taa u modungohe to daantia wau butoo̒ lo Eeya, hepilohutu lo Eeya wolo ponu wau debo molotolo hilao.

¹¹ Yaa Eeya, ambungualo mai watotia motuuu̒de wolo danti lo Eeya, sababu udaa̒ totala lowatotia.

¹² Eeya mongaajali totaa saale tumutumulo dalalo u musi nao̒o limongolio.

¹³ Timongolio madebo tumumulo wolo maa̒muru, walao̒ wau wombu limongolio mao̒haku mololimo huta pusaka.

¹⁴ Eeya yito sahabati lotaa u saale tumutumulo, Eeya helo poi̒laalo makusudu lo Eeya toli mongolio.

¹⁵ Mato lowatotia debo manta-mantahu ode Eeya, sababu Eeya lopoa̒ahu olo watotia lonto baala.

¹⁶ Bilohilo watotia, wau ponua mai watotia, sababu watotia tutuuwau wau duto-dutolo.

¹⁷ Osuusa hilaa lowatotia lebe he oduhenga mola lopataalo mai watotia monto ileepita lowatotia.

¹⁸ Poo̒tuotilo mai dudutolo wau osuukali lowatotia, wau ambungualo mai ngoa̒amila dusa lowatotia.

¹⁹ Bilohilo mai malo odito daatalio musu lowatotia; timongolio molonuo̒ daa̒ olo watotia.

²⁰ Dahailo wau poa̒ahuwalo mai watotia, alihu watotia diila moo̒tapu woolito, sababu watotia hemo tiduo̒la mola to Eeya.

²¹ Pohileaala dua̒ u mopiohu wau u juujulu modaha olo watotia, sababu watotia hemo haarapu mola to Eeya.

²² Yaa Allahu Taa̒ala, lopataalo mai umati lo Eeya monto totoonulalo ileepitalio.