JABURU 22 - KITABI HABARI MOPIOHE

Dua̒ tou̒ usuusa wau lahu lo poloi̒laalo momuji

¹ Duo̒lo diriheni lopolemboa̒ tamoolahua. Lodudua̒ao̒ lahu: Buu̒lu tou̒ mato lodulahu mamobutu mai. Jaburu lei Dauda.

² Allahu Taa̒ala lowatotia, yaa Allahu Taa̒ala lowatotia, yilongola Eeya lololaa olo watotia? Watotia longiibode mola, bo Eeya debo molamingo wau diila lotulungi mai to watotia.

³ Yaa Allahu Taa̒ala lowatotia, watotia longiibode mola tou̒ dulahu, bo Eeya debo poo̒poo̒oyo. Watotia longiibode mola tou̒ hui, hilaa lo watotia debo diila meiduo̒to.

⁴ Bo Eeya Olongia Taa Laba-labaalo mantali, tahe puji-pujio lo Isirai̒lu.

⁵ Nenemoya lo mongowatotia helo haarapu mola to Eeya, timongolio helo haarapu, wau Eeya lopoa̒ahu mai olimongolio.

⁶ Timongolio helo ngiibode mola to Eeya wau yilopatai; timongolio helo haarapu mola wau diila piloo̒ kikiio̒ tohilao.

⁷ Bo watotia botie luanti, diila manusia, pilohentea̒ wau hilina lotaa dadaata.

⁸ Ngoa̒amila taloo̒onto olo watotia, helo hantia̒ olo watotia, hibii̒ya lo tunggilo wau hipo tahalilia lo lunggongo.

⁹ Uali nongolio, “Poluliaalo mao̒ tio hemo pongaku to Eeya, alihu Eeya mopoa̒ahu olio, wonu Eeya sanangi to olio!”

¹⁰ Eeyaalo talo polualai olo watotia lonto talomo, wau helohutu mai olo watotia aamani to too̒opu liilo lowatotia.

¹¹ Tumulalo pilotutu mai, paladu lowatotia woluo to uluu̒ lo Eeya, tumulalo mai todelomo talomo, Eeyaalo Allahu Taa̒ala lowatotia.

¹² Diila mao̒ pohalahu, sababu baala malo himbidei, wau diaaluo tamo tulungi mai.

¹³ Debo odelo himbala sapi lo oa̒ayua, musu helo aambua mai to watotia, debo odelo sapi lo oa̒ayua molinggelo monto Basan timongolio helomala olo watotia.

¹⁴ Timongolio helo taalua wolo watotia wolo ngango hingangoa, debo odelo singa u hemo heuwanga wau modangapo.

¹⁵ Lotolo watotia helo pulito debo odelo taluhu u lobangguwato, ngoa̒amila tulalo watotia lolopato lonto leletualio, wau hilaa lowatotia lodidi debo odelo talu.

¹⁶ Bunggohu lowatotia lohengu debo odelo poo̒ lo winggilua, dila lowatotia leidembinga to wangodu ngango lowatotia. Yaa Eeya, tilolaa lo Eeya watotia toitaato peaahuo̒ debo odelo taa u mailate.

¹⁷ Watotia hebilaala lo woomboa taa moleeto; debo odelo himbala lo apula timongolio helo aambua mai to watotia, helo looo̒ uluu̒ wau oa̒ato watotia.

¹⁸ Ngoa̒amila tulalo watotia o yia̒apa lowatotia, musu lomilohe olo watotia odelo hepo bibiilohe lotau.

¹⁹ Timongolio lolaya-layadeo̒ pakeyangi lowatotia, wau helo mahuta undi to jumba lowatotia.

²⁰ Bo Eeya, diila mao̒ polamingo, yaa Eeya, hua̒a podunggaalo mai motulungi olo watotia, sababu Eeyaalo olootolo watotia.

²¹ Lopotaalo mai nyawa lowatotia monto wamilo, poa̒ahuwalo mai watotia monto dangapo lo apula.

²² Watotia diila olotolo, lopataalo mai watotia monto tunge losapi oa̒ayua wau monto tunggilo hayahayao̒ singa.

²³ Huhutu lo Eeya maa wunggulio lowatotia ode mongo wutato lowatotia; todelomo dudunggaya umati lo Eeya watotia mamomuji-muji mola to Eeya.

²⁴ Pujialo mola Eeya, wuu tau-tauwalo tahi saalea! Pou̒daa̒alo mola Eeya, wuu ngoa̒amila wali mai lei Yako! Posujudulo to Eeya, ngoa̒amila wali mai lo Isirai̒lu!

²⁵ Sababu Eeya diila momilohe hina taa hideehea, wau diila momilohe gambangi polodutolio. Eeya diila mopalingo monta tau boito, bo modungohe wonu tio mei̒ tulungi to Eeya.

²⁶ To huungo aambua lo umati watotia momuji mola to Eeya, sababu totoonulalo u mapilohutu mai lo Eeya. To talu lo umati tahisaalea pilodewo lowatotia bake u pilodanti lowatotia.

²⁷ Taa mosikini mamolamelo tunggula mobutuhu; taa u monao̒ mai ode Eeya mamomuji mola to Eeya. Pohileaala dua̒ timongoli aamani sontosa wau maa̒muru ohihieo-hiheolo mao̒!

²⁸ Ngoa̒amila bangusa mamoe̒ela mola to Eeya wau muli mohualinga ode Eeya, totoonulalo suku bangusa mamo sujudu molubo to Eeya.

²⁹ Sababu Eeyaalo tao̒kawasa, Eeya momalenta babaa-ngusawalo.

³⁰ Ngoa̒amila taa udaa̒ mamosujudu totalu lo Eeya, ngoa̒amila manusia mowali moruusa mamo sujudu molubo to Eeya.

³¹ Hilaide domi hilaide wumbutio mola mataa̒aluku wau mohurumati to Eeya, tio mapo loladulo wawaalia mola.

³² To bangusa tapilotutu mai lapatio mao̒ mapo loladulo deu̒ Eeya malo poa̒ahu mai umati-Lio