JABURU 19 - KITABI HABARI MOPIOHE

Odudaa̒ lo Eeya todelomo pilowali wau todelomo buto-Io

¹ Duo̒lo diriheni lopolemboa̒ tamoolahua. Jaburu lei Dauda.

Odudaa̒ lo Eeya todelomo pilowali-Lio

² Hulungo mopoi̒laalo odudaa̒ lo Allahu Taa̒ala, wau ayuntala mopololadu huhutu lo Eeya.

³ Dulahu u tuwau mopo tunggulao̒ to dulahu u wumbutio mola; hui u tuwau mohungguli mao tou̒ hui u lapatio mao̒.

⁴ Diaaluo tamobisala meaambo moloi̒-loi̒ya, diaaluo suala u odungohe.

⁵ Bo iibodio motoliyongo to ngilanggubu dunia, tahuli boito demola huhuudu dunia. Eeya lohutu bele to hulungo ode mato lodulahu,

⁶ didimodupo tio motinelai debo odelo bulaintiti talolai̒ yilumualai lonto huwaliilio, debo odelo pahalaawani taleengahu lolumulao̒ nonao̒olio.

⁷ Tio lotiduluhe to hulungo lonto huudiu ode huudiu; diaaluo taloo̒hei lonto patulio.

Butoo̒ Eeya

⁸ Butoo̒ Eeya boito ngoa̒amilalo wimu-wimumuto, moo̒luli hilao. Palenta lo Eeya mowali yakiniyalo, mongohi mai hikimati totaa biasa.

⁹ Wuu̒du lo Eeya boito tuhata, moposanangi hilao. Ototapu lo Eeya boito belesi, mohutu totau mongalati.

¹⁰ Motaa̒luku wau mohulumati to Eeya boito mopiohu, pohupohutu ohiheo-hiheolo mao̒. Butoo̒ Eeya boito otutu wau aadili ngoa̒amilalo.

¹¹ Butoo̒ Eeya lebe ohalaga wolo hulawa tutu, lebe moolingo wolo hula lotiia̒ tutu.

¹² Wato lo Eeya pilopo eelao̒ to ngoa̒amilalo boito; wuupa udaa̒ leidapato duo̒lo taa u modungoheo̒.

¹³ Diaaluo tamoo̒ paahamu ololapalio; yaa Eeya, lopataalo mai watotia monto totala u depudepuhe.

¹⁴ Pohalahe mao̒ monto dusa u silangaja, diila mao̒ polulia mai watotia kawasaalio. Yi watotia mamowali diila o aibu, wau molopato monto totala mobuheeto.

¹⁵ Pohileaala dua̒ tataa-heyaalo wau pikiilangi lowatotia motuhatawa to Eeya, yaa Eeya, tamoo-duo̒lawa wau tamoo-tolotawa olo watotia!