JABURU 18 - KITABI HABARI MOPIOHE

Lahu ohohaama lei Dauda

¹ Duo̒lo diriheni lopolemboa̒ tamoolahua. Jaburu lei Dauda, wato lo Eeya. Pilopolahu mola ode Eeya tou̒ tei Dauda lolopato lonto olei Saulu wau lonto mumuu-suulio.

² Ilohilaa lo watotia to Eeya, yaa Eeya, Eeyaalo olootolo watotia.

³ Eeya debo odelo biintengi u motoheto tambati potiduo̒la lowatotia. Allahu Taa̒ala lo watotia debo odelo hui̒dee botu tambati potililunga lowatotia. Debo odelo porisai, Eeya lolau̒bei olo watotia, wau helodaha olo watotia alihu aamani laito.

⁴ Watotia longiibode mola to Eeya tapaatuti pujiolo, Eeya helo lolopatai olo watotia lonto mumuu-suwaalo watotia.

⁵ Watotia pilalita baala lo mautu heilomo taluhee daa̒ lo obobinasa.

⁶ Watotia pilalita baala lo mautu, taalo mautu woluo totalu lowatotia.

⁷ To delomo ileepita lowatotia, watotia helo ngiibode mola to Eeya, watotia longuatia̒ mola ode Allahu Taa̒ala lowatotia lei̒ tulungi mai. Lonto Bele-Lio Eeya lodungohe suala lowatotia wau lopoo̒ tuotai iibodu lowatotia.

⁸ Lapatao̒ huta lolotau̒lo wau hilumuhela, bubuu-ngowalo hui̒dee loe̒etu wau hilumuhela sababu omuluka lo Allahu Taa̒ala.

⁹ Poloo̒ helo mukaa̒i lonto huango wulingo lo Eeya, tulu wau bohu yilumualai lonto ngango lo Eeya.

¹⁰ Hulungo biluta Io, lapatao̒ lotuhutai Eeya wolo heengo modio̒lomo to walungo oa̒a-Tio.

¹¹ Eeya tombo-tomboto wolo tae̒tae̒ to malaikati opolipio̒; Eeya yilumolaao̒ to yitaato polipio̒ dupoto.

¹² Eeya lohenggube batanga-Lio wolo modio̒lomo; heengo monto dio̒loma u mohulodu helo malita to Eeya.

¹³ Monto ilato totalu-Lio, yilumualai heengo, didi esi wau tulu.

¹⁴ Lapatao̒ Eeya loti bulonggodei lonto dulente; Taa Laba-labaalo molanggato helo podungohei sualaa-Lio.

¹⁵ Eeya lopo mutahei paapaana-Lio wau helopo bubuua̒lawa to musu; Eeya lopo dehitai ilato wuwuulia, wau helohutu olimongolio tilumeteo̒.

¹⁶ Wamoo̒ deheto diilalo depudepuhe wau wumbato huta yilohuo̒ tou̒ Eeya longantinga musuu-Lio wolo muluka.

¹⁷ Monto yitaato Eeya lohudu mai uluu̒-Lio; dilihima-Lio wau̒ wau bilantanga-Lio lonto taluhee u modelomo.

¹⁸ Eeya lopoaahu mai olau̒ lonto musu tamolotolo boli buheli daa̒ wau lonto tau-tauwalo lo tahi polonua̒wa olau̒, sababu timongolio malo odito lotolo to olau̒.

¹⁹ Timongolio heloluhu olau̒ tou̒ wau̒ ilodungga lobaala, bo Eeya tahe lotulungi mai olau̒.

²⁰ Eeya lolopatai olau̒ lonto baala wau lopoa̒ahu olau̒ sababu Eeya lotuhatawa to olau̒.

²¹ Eeya lomaalasi mai huhutuuu̒ u otutu; Eeya lobalakati mai olau̒ sababu wau̒ diila ototala.

²² Wau̒ lodungohe palenta lo Eeya wau diila lopalingo lonto dalalo Allahu Taa̒alau̒.

²³ Ngoa̒aa̒mila buto-Io piloo̒ tuotuu̒, totoonulalo palentaa-Lio diila pilalonguu̒.

²⁴ Otaawa lo Eeya deu̒ wau̒ diila o aibu wau lopohalahu batanga lonto totaala.

²⁵ Yi Eeya lomaalasi mai huhutuuu̒ u otutu sababu otaawa lo Eeya watotia diila ototala.

²⁶ Yaa Eeya, Eeya tatapu wau molotolo hilao totaa utatapu wau molotolo hilao wau mopiohe totaa u mopiohe.

²⁷ Totaa u mantali Eeya lopoi̒laalo batanga lo Eeya u mantali, bo totaa u moleeto miluusua lo Eeya.

²⁸ Taa u dupadupapa lohilao piloa̒ahu lo Eeya, bo taa u batingga pilopo taa̒aluku lo Eeya.

²⁹ Eeya helo polei̒tao̒ tohe lowatotia; Eeya Allahu Taa̒ala lowatotia helo pobaangai lunggongo watotia.

³⁰ Eeya lopoo̒ lotolai olo watotia u lopobinasa tomusu; wolo tulungi lo Allahu Taa̒ala lowatotia ilaantulu lowatotia biintengi limongolio.

³¹ Huhutu lo Allahu Taa̒ala ngoa̒amilalo wimu-wimumuto danti lo Eeya mowali yakiniyalo. Eeya debo odelo porisai ode ngoa̒amila tamo tiduo̒la to Eeya.

³² Sababu bo Eeyaalo wambao̒ Allahu Taa̒ala; Allahu Taa̒ala tamooduulua olanto.

³³ Eeyaalo Allahu Taa̒ala talo poo̒lotolai olo watotia wau helohutu dulahu watotia aamani.

³⁴ Eeya helo poo̒lotolai oa̒ato watotia debo odelo oa̒ato buu̒lu, wau lodaha mai oa̒ahu lowatotia to hihui̒-hui̒dea.

³⁵ Eeya helo poo̒olatai olo watotia u mopaatea, tilinggula watotia loo̒ bua̒deo̒ buutio̒ u laba-labaalo motoheto.

³⁶ Yaa Eeya, Eeya loduo̒lai wau lopoa̒ahu olo watotia, wau helo lumude olo watotia wolo kawasa lo Eeya; watotia lowali lebe lolaio̒ sababu huhutu lo Eeya.

³⁷ Hedilaha lo Eeya watotia alihu watotia diila otawalo, wau watotia diila pee̒enta mao̒ lodehu.

³⁸ Yililapita lo Eeya musu lowatotia wau piloo̒laahe lowatotia timongolio, wau sama-samaata diila tilumouli tunggula timongolio binaasa.

³⁹ Pilobanti lowatotia timongolio tunggula diilalo loo̒ bongu, timongolio heleelei balata diilalo o lotolo totalu lo oa̒ato watotia.

⁴⁰ Yilohi mai lo Eeya watotia lotolo u mopaatea, wau ohohaama to mumuu-suuwaalo watotia.

⁴¹ Pilohutu lo Eeya musu lowatotia tilumeteo̒ lonto watotia; tau-tauwalo tahi polonua̒wa olo watotia pilobinasa lowatotia.

⁴² Timongolio longuatio̒, bo diaaluo tahe lotulungi, timongolio helo ngibodu ode Eeya, bo Eeya diila lolametai.

⁴³ Timongolio pilotoyopu lowatotia debo odelo peaahuo̒ u helo pupuulepelo mao̒, wau ilaa̒ata lowatotia debo odelo latao̒ to dalalo.

⁴⁴ Eeya lopo lopatai watotia lonto kaumu tamomaahu palenta, wau lopowali olo watotia takaawasa to babaa-ngusawalo; bangusa tadiila otaawa lowatotia lowali wato lowatotia.

⁴⁵ Tau-tauwalo tahideelia lotaa̒aluku towatotia wau modungohe wonu palenta lowatotia.

⁴⁶ Obuuheli limongolio mailooli; timongolio hilumuhela wau yilumualai lonto biintengilio.

⁴⁷ Eeya tumutumulo! Ilopujialo mola tamooduulua olau̒! Pou̒daa̒alo mola odudaa̒ lo Allahu Taa̒ala tahe lopoa̒ahu olau̒!

⁴⁸ Eeya helongohi olo watotia u loo̒haama tomusu lowatotia mai olau̒ to musuu̒; babaa-ngusawalo hepilopo taa̒aluku lo Eeya totalu lowatotia,

⁴⁹ hipiloa̒ahu lo Eeya watotia lonto mumuusuuwaalo watotia. Yaa Eeya, yilohi mai lo Eeya watotia u loo̒ haama tomusu lowatotia, diluo̒lai lo Eeya watotia lonto tau-tauwalo tahi parangia.

⁵⁰ Yi pou̒daa̒ mola lowatotia Eeya towolota lo babaa-ngusawalo, polahua mola lo watotia puji poloi̒laalo momuji ode Eeya.

⁵¹ Allahu Taa̒ala helongohi u loo̒haama daa̒ to olongia-Lio, Eeya debo momonu taa tilulao-Tio, duu̒yito-yito tei Dauda wau waliilio mola u ohiheo-hiheolo mao̒.