JABURU 149 - KITABI HABARI MOPIOHE

Lahu poloi̒laalo momuji

¹ Pujiaalo mola Eeya! Polahuwalo mola lahu bohu ode Eeya, pujiaalo mola Eeya todelomo aambua umati lo Eeya!

² Potisanangilo, wuu Isirai̒lu sababu Talopowali mai olemu; powengahulo, wuu tuango lo Sion sababu Olongiamu!

³ Pujiaalo mola tanggulo Eeya wolo elungo boli elungo, pujiaalo mola Eeya wolo kocapi wau rabana!

⁴ Eeya motuhatawa to umati lo Eeya; Eeya mopoo̒haama totaa udupa-dupaapa lohilao.

⁵ Huliaalo mao̒ umati lo Allahu Taa̒ala motiwengahu sababu Eeya laito ohaasili, wau mopolahu mola wengahu oo̒onua.

⁶ Huliaalo mao̒ timongolio momuji mola Allahu Taa̒ala wolo suala moo̒ohuu̒, sambela modihu wamilo dumba-dumbato

⁷ u momaalasi babaa-ngusawalo, wau mohukuumani susuu-kuwaalo bangusa;

⁸ u momungu mongo olongia, wau morante tahi kawaasawa limongolio;

⁹ u mohukumani babaa-ngusawalo to palenta lo Allahu Taa̒ala. Uitolo ohohaama umati tapilonu lo Eeya. Pujiaalo mola Eeya!