JABURU 147 - KITABI HABARI MOPIOHE

Poloi̒laalo momuji ode Allahu Taa̒ala Taa Laba-labaalo kawasa

¹ Pujiaalo mola Eeya! Sababu mopiohulo momuji mola to Eeya, wau moposanangi u mopolahu mola poloi̒laalo momuji to Eeya!

² Eeya mamo ponguli mai Yerusalemu; tau-tauwalo polayahu madeloo lo Eeya mohualingo.

³ Eeya mopoo̒luli taa uilooli obobuheli, wau momolobani pali limongolio.

⁴ Eeya helolantu jumulaa lo binatangi to dulente, wau tinggai yilohia lo Eeya tanggulo.

⁵ Otutu udaa̒ wau polu-polutuo̒ Eeyaanto, tinepo lo Eeya diila o eenggadelio.

⁶ Eeya mopotihulo taa u hideehea, bo taa umoleeto pilobanti lo Eeya ode huta.

⁷ Polahuwalo mola puji poloi̒laalo momuji ode Eeya, poitoheelo kocapi ode Allahu Taa̒alanto.

⁸ Eeyaalo talomua̒de heengo to hulungo; Eeya lopodapato didi ode dunia, wau helohutu huhuu-oyotowalo lobutu to huludu.

⁹ Eeya longohi mai ua̒alo ode binatangi, wau ode walao̒ paao̒ u hemotia-tiango.

¹⁰ Owengahu Eeya diila wadala u molotolo; diila olo tamoo-hipatea u buheli.

¹¹ Eeya sanangi totaa u saale, totaa u debo hemo tiwunela toponu lo Eeya.

¹² Pujiaalo mola Eeya, wuu Yerusalemu! Pujiaalo mola Allahu Taa̒alamu, wuu Sion!

¹³ Sababu Eeya mopoo̒ tohetai huhuu-hebuwaalo hulubangimu, wau mobalakati mai ulipumu.

¹⁴ Eeya modaha mai madalamu alihu debo aamani, wau moposanangi mai olemu wolo pale u mopiohe daa̒.

¹⁵ Eeya longohi mai palenta ode dunia, wau tahuda lo Eeya hua̒a pilohutu.

¹⁶ Eeya lopodungga mai botua wumbuo̒ lotaluhu moputio̒ debo odelo pini, wau lomua̒yadei wambulo lowali loobuo̒ wau motoheto debo odelo peaahuo̒.

¹⁷ Eeya lopo tuhutai didi esi debo odelo bilato; diaaluo taloo̒ taahangi lotaalua wolo huhuulio.

¹⁸ Lapatao̒ to palenta lo Eeya esi boito lodidi; Eeya lohiipai dupoto, yi taluhee olo tilumolohu.

¹⁹ Eeya loposambe tahuli lo Eeya to umati lo Eeya, opiduduto wau butoo̒ Eeya to umati tilulaoto Eeya.

²⁰ Eeya diila helohutu odito to babaa-ngusawalo wewo, timongolio diila motota bubuu-too̒waalo Eeya. Pujiaalo mola Eeya!