JABURU 146 - KITABI HABARI MOPIOHE

Poloi̒laalo momuji ode Allahu Taa̒ala tamoo-poa̒ahua

¹ Pujiaalo mola Eeya! Wuu jiwa lowatia, pujiaalo mola Eeya!

² Watia ohilaa momuji mola Eeya ngotupa lo tutumulo watia wau mopolahu mola duo̒lo Allahu Taa̒alau̒ ngotilonggadu waatia woluo.

³ Diila mao̒ potiwunela to takawa-kawaasa, to manusia tadiila mowali mopoa̒ahu.

⁴ Wonu timongolio mate, timongolio muli mohualinga ode huta; to dulahee boitolo ngoa̒amila patuju limongolio mooli.

⁵ Potisanangilo tutu taa u mopongaku to Eeya Allahu Taa̒alaalio, wau o Allahu Taa̒ala lei Yako odelo tamoo-tulungia olio.

⁶ Eeyaalo talo powali hulungo wau dunia, deheto wau totoonulalo tuangio; Eeya tatapu wau molotolo hilao ohiheo-hiheolo mao̒.

⁷ Eeya mopoduulua haku lotau-tauwalo tahideehea, wau mongohi ua̒alo totaa upola-polaango. Eeya molopato tau-tauwalo tahi tahaangia,

⁸ wau mohutu taa pitoo̒ mowali moo̒onto. Eeya momintaa̒ taa u modehu, wau momonu taa u juujulu.

⁹ Eeya moduo̒la tau-tauwalo deli; Eeya motulungi tomongo janda wau tadidu otiila otiyamo, bo diila mopomata patuju lotaa moleeto.

¹⁰ Eeya boito Olongia u ohiheo-hiheolo mao̒. Wuu Sion, Allaahu Taa̒alamu okawasa ngotilonggadu totoonulalo massa ngohetuto taunu. Pujiaalo mola Eeya!