JABURU 144 - KITABI HABARI MOPIOHE

Ti olongia helo sukuru mola to Eeya to ohohaamalio

¹ Lonto olei Dauda. Pujiaalo mola Eeya tamoo-duo̒lawa olaatia! Eeya lopoo̒laatai olaatia lotuuhua, wau helo ngaajali mai olaatia lopaatea.

² Eeyaalo tamoo-tulungia wau tamoo-duuluwawa olaatia, tamoo-poa̒ahua olaatia tambati potiwolunga lowatia. Eeya tamoo-duo̒lawa olaatia, tambati mopoa̒ahu batanga lowatia, babaa-ngusawalo pilopo taa̒aluku lo Eeya odelaatia.

³ Yaa Eeya, tatoonu manusia tilinggula piloo̒ tuotai lo Eeya tio? Tatoonu tio tilinggula Eeya momandungi olio?

⁴ Manusia boito debo odelo ngohiipo dupoto, debo odelo wolilu lopaluto, odi-oditolo mola tutumulio.

⁵ Yaa Eeya, huo̒oilo hulungo Eeya wau polaahulo mai, dedeetaalo huhuu-ideyaalo alihu mohubulo.

⁶ Pomahulaalo ilato Eeya alihu musu mobubuu-alaawa, lopataalo mai pana lo Eeya alihu timongolio rame daa̒.

⁷ Wuduwalo mai uluu̒ lo Eeya monto sologa, wau lopataalo mai watotia monto taluhee daa̒. Poa̒ahuwalo mai watotia monto tau deli

⁸ tao̒hilaa mohimbulo wau mongaakali, wau hemomintaa̒ mola tadia paaluti.

⁹ Watotia mamopolahu mola lahu bohu ode Eeya, yaa Allahu Taa̒ala, wau mokuti kocapi sambela mopolahu mola.

¹⁰ Eeya helongohi u loo̒haama tomongo olongia, wau lolopato olei Dauda wato lo Eeya.

¹¹ Lopataalo mai watotia monto wamilo lotaa diila omanusia; poa̒ahuwalo mai watotia monto kawasa lotaa deli tao̒hilaa mohimbulo wau mongaakali, wau hemomintaa̒ mola tadia paaluti.

¹² Pohileaala dua̒ mongo walao̒ lolai̒into tomaasa humulalio debo odelo pilomulo mowali udaa̒ mola. Pohileaala dua̒ walao̒ mongo buwanto debo odelo wolihi gaga, u modadai mamaa-ntahuwalo bele biluloa̒ saaha li olongia.

¹³ Pohileaala dua̒ Yiiyii-bungunto mopolu tuangio wolo totoonulalo tilapulo huta u hidala-dalaala. Pohileaala dua̒ ngoa̒amila himba to huhuu-tawaalo datahu u luasi olanto owalaa̒ai tunggula pulua lolihu daatalio.

¹⁴ Pohileaala dua̒ ngoa̒amila sapinto motonggalao̒ wau diaaluo u mooli meaambo eenggila. Pohileaala dua̒ diila odungohe wuwaatio̒ modutolo to dadaa-lalaalo lo kotaanto.

¹⁵ Potisanangilo tutu bangusa tao̒dito, potisanangilo tutu umati u Allahu Taa̒alaalio Eeya!