JABURU 143 - KITABI HABARI MOPIOHE

Dua̒ mei̒ tuulungi

¹ Jaburu lei Dauda. Yaa Eeya, dungohilo mai dua̒ lowatotia, poo̒otuotilo mai polohone lowatotia. Pomataalo mai dua̒ lowatotia domi oa̒adili lo Eeya.

² Watotia botie wato lo Eeya, diila mao̒ pomutoa̒ olo watotia, sababu diaaluo taa udiila ototala totalu lo Eeya.

³ Musu lowatotia malo hilapita wau lopoo̒laahe olo watotia, wau lopotuoto olo watotia ode delomo tutupa u modio̒lomo; watotia lowali debo odelo taa u malohiiheo yilate.

⁴ Watotia madidu osumaangati, hilaa lowatotia laba-labaalo lolingu.

⁵ Ileela mola lo watotia duduu-laheyaalo u malo paluto; pilikiilangi mola lowatotia totoonulalo huhutu lo Eeya, watotia lotipoo̒yo lomikiilangi mola ngoa̒amila huhutu lo Eeya.

⁶ Watotia hemodua̒ mola to Eeya wolo uluu̒ bua̒bua̒adu; debo odelo huta u mohengu, jiwa lowatotia mooloolo to Eeya.

⁷ Tametilo mai watotia wolo molamemeto yaa Eeya, sababu watotia mailoolia lo halaapani. Diila mao̒ potituuo̒ monto watotia, alihu watotia diila mao̒ debo odelo tamalo tuhuta mola ode aalamu lomautu.

⁸ Timii̒du dimodupo poe̒elaalo mai watotia toponu lo Eeya, sababu to Eeyaalo potiwunela lowatotia. Pobiloheelo mai ode watotia dalalo u musi ponao̒wa lowatotia, sababu bo to Eeyaalo watotia modua̒ mola.

⁹ Watotia monao̒ mai ohilaa motiduo̒la to Eeya, yaa Eeya, lopataalo mai watotia monto mumuu-suuwaalo watotia.

¹⁰ Poo̒laata mai watotia moponao̒ kahandaki lo Eeya, sababu Eeyaalo Allahu Taa̒ala lowatotia. Eeya mopiohe hilao, wau mamodelo olo watotia todalalo upaya-payadu.

¹¹ Poa̒ahuwalo mai watotia motuuu̒de wolo danti lo Eeya, yaa Eeya, domi opohiohu lo Eeya, lopataalo mai watotia monto ileepita.

¹² Domi ponu lo Eeya pobinasaalo mai ngoa̒amila musu lowatotia, ambunguolo pobinasaalo mai ngooa̒amila tahipo deehea olo watotia, sababu watotia wato lo Eeya.