JABURU 140 - KITABI HABARI MOPIOHE

Dua̒ mei̒ duo̒lai

¹ Duo̒lo diriheni lopolemboa̒ tamoolahua. Jaburu lei Dauda.

² Lopataalo mai watotia monto taa moleeto, yaa Eeya, dahailo mai watotia to taa u hipohutua diila o manusia.

³ Timongolio hemo matuju u moleeto todelomo hilao, wau timii̒du dulahu hemo potoodei tolonggalo.

⁴ Dila limongolio debo odelo tulidee obisa, loi̒ya limongolio debo odelo peedi lotulidee titiidu.

⁵ Yaa Eeya, duo̒lalo mai watotia monto kawasa lotaa moleeto, dahailo mai watotia totaa hipohutua diila omanusia u opatuju mopodehu olo watotia.

⁶ Taa sombongi poo̒-poo̒oyo hemo pohuli taalo ode watotia, wau hemomua̒de pajala u moheu̒pa olo watotia. To ngohilayaa̒ lo dalalo timongolio hemo pohuli popotilo uu̒ulungo u moheu̒pa wolo uu̒ulunga olo watotia.

⁷ Yaa Eeya, watotia moloi̒ya mai: Eeyaalo Allahu Taa̒ala lowatotia, poo̒tuotilo mai dua̒ polohone lowatotia.

⁸ Eeya, Allahu Taa̒ala lowatotia, talo poa̒ahu olo watotia wau tamolotolo, Eeya malo duo̒lai olo watotia todelomo popaatea.

⁹ Diila mao̒ dungohi u ilohilaa lotaa moleeto, yaa Eeya, diila mao̒ polulia patuju limongolio momata.

¹⁰ Diila mao̒ polulia musu lowatotia moo̒haama; huliaalo mao̒ loloo-iyaalo moleeto u yilapali mongolio molemba batanga limongolio tahemo pitana olo watotia.

¹¹ Huliaalo mao̒ timongolio lihua mai bohu lotulu, wau pomahulio ode delomo wangopa lomautu, tilinggula diilalo moo̒lualai.

¹² Huliaalo mao̒ taa u hipohutua diila omanusia odungga lobaala, diila mao̒ polulia tamoo-pitanaawa motibiluloa̒ todunia.

¹³ Otaawa lo watotia Eeya mongohi mai ua̒adili totaa hideehea, wau mopoduulua palakala lotaa mosikini.

¹⁴ Taa juujulu mamomuji mola to Eeya; timongolio mamotitola pee̒-pee̒enta wolo Eeya.