JABURU 139 - KITABI HABARI MOPIOHE

Allahu Taa̒ala laba-labaalo motota wau molaalai totoonulalo u hitua-tuawua

¹ Duo̒lo diriheni lopolemboa̒ tamoolahua. Jaburu lei Dauda. Yaa Eeya, Eeya molonea̒i olo watotia wau motota lo watotia.

² Otaawa lo Eeya totoonulalo huhutu lowatotia; monto molamingo Eeya mongalati pikiilangi lo watotia.

³ Eeya momilohei olo watotia, mopio watotia mokalaja meaalo huhe-huheeli, otaawa lo Eeya totoonulalo u hepohutuo lo watotia.

⁴ Tumbao̒ tou̒ watotia diipo mobisala, otaawa lo Eeya wolo u maloi̒ya lowatotia.

⁵ Eeya lomalita olo watotia lonto totoonulalo mantahu, wau diluo̒lai lo Eeya watotia wolo kawasa lo Eeya.

⁶ Mailaba delomio ode watotia pongotota lo Eeya boito, diila ooma lo pikiilangi lowatotia.

⁷ Deu̒toonu mowali ponao̒wa lowatotia alihu molopato monto kawasa lo Eeya? Deu̒toonu mowali polahia lowatotia motilamingo monto talu lo Eeya?

⁸ Wonu watotia mobotula mola ode hulungo, Eeya woluo mola teto, wonu watotia motuluhe to aalamu lomautu, teto olo Eeya woluo.

⁹ Wonu watotia tumomboto molibaya bungo lohulungo tiimuru meaambo motipoo̒oyo to huudu otolopa u molaminga daa̒,

¹⁰ mola teto olo Eeya motulungi olo watotia; molateto olo uluu̒ lo Eeya modelo olo watotia.

¹¹ Wonu wototia mohile alihu modio̒lomo mohenggubei olo watotia, wau mobaango topalito watotia mowali hui,

¹² yi odio̒lomo boito olo diila modio̒lomo duo̒lo Eeya; hui boito mobaango debo odelo dulahu, wau modio̒lomo boito debo odelo mobaango.

¹³ Eeya lopowali mai timii̒du wimbihu wawao̒ lowatotia, wau lohutu olo watotia todelomo talomo liilo lowatotia.

¹⁴ Watotia momuji mola to Eeya sababu watotia polu-polutuo̒ daa̒! Totoonulalo huhutu lo Eeya moo̒heerani wau moo̒linggolabu, otu-otutuulo mao̒ watotia lotota mai lou̒tau.

¹⁵ Tou̒ tutuu-lalowaalo watotia pilopowali, wolo ulintapo pilopo wuwuumbuta todelomo talomo liilo watotia, hiambola watotia lobutu mai mola teto wolo hulihuli, watotia diila leituuo̒ to Eeya.

¹⁶ Eeya momilohe olo watotia tou̒ watotia donggo todelomo talomo; ngoa̒amilalo leituladee todelomo buku lo Eeya; duduulahio matilantu mai tou̒ diipo tuwau mao̒ tilumula.

¹⁷ Mailaba totolio pikiilangi lo Eeya duo̒lo watotia, yaa Allahu Taa̒ala, wau jumulaalio malo odito daatalio!

¹⁸ Wonu yia̒apa mola lowatotia, lebe dadaata wolo hungayo; wonu watotia mobongu mai, Eeya debo donggo to pikiilangi mola lowatotia.

¹⁹ Bolo potala taa moleeto pobinasaa mai lo Eeya, yaa Allahu Taa̒ala, pohalahe mao̒ tamoomatea mate-mateelo mao̒ monto watotia!

²⁰ Timongolio hemoloi̒ya u moleeto pasali lo Eeya, wau hemotadia paaluti domi kokoo-tawaalo Eeya.

²¹ Yaa Eeya, yilonuo̒ watotia taa u hemolonuo̒ to Eeya, hilaa lowatotia lolee̒ totaa u hemoluwali to Eeya!

²² Timongolio yilonuo̒ daa̒ lowatotia, wau ilanggapu lo watotia odelo musu.

²³ Tuleteaalo mai watotia yaa Allahu Taa̒ala, tonea̒alo mai hilaa lowatotia, tesiyaalo mai watotia wau ototai mao̒ pikiilangi lowatotia.

²⁴ Bilohilo mai diila otaawa woluo ololeeto todelomo batanga lowatotia, wau delowalo watotia todalalo u ohiheo-hiheolo mao̒.