JABURU 132 - KITABI HABARI MOPIOHE

Poloi̒laalo momuji ode Bele lo Eeya

¹ Lahu jiara. Yaa Eeya, eelailo mola tei Dauda, wau totoonulalo polodutolio.

² Diila mao̒ lipata tutuboolio to Eeya yaa Eeya, u dantilio to Eeya Taa Laba-labaalo molotolo, Allahu Taa̒ala lei Yako.

^3-4 Ualio mao̒, “Wau̒ diila tamohuheli to beleu̒ meaalo motuluhu to tambati potuluheu̒,

⁵ tou̒ diipo mopodapato bele duo̒lo Allahu Taa̒ala lei Yako, tambati potibiluloa̒ duo̒lo Eeya Taa Laba-labaalo molotolo.”

⁶ To Betlehemu ilodungohento pasali lo Bulua Daantia, tulusi ilodunggaalio tohuta datahu wau luasi lo Yaar.

⁷ Duloolo ito monao̒ mola ode tambati potibiluloa̒ lo Eeya, wau molubo to Eeya totalu lokadera yilaidia-Lio.

⁸ Podunggaalo mai potibiluloo̒lo to Bele lo Eeya, yaa Eeya, pee̒-pee̒enta wolo Bulua Daantia, bayahu kawasa lo Eeya.

⁹ Pohileaala dua̒ umati lo Eeya motingalaa̒ meengahu, wau mongo iimamu laito tumumulo modudua̒ kahandaki lo Eeya.

¹⁰ Domi tei Dauda wato lo Eeya, diila mao̒ potoulia olongia tilulaoto Eeya.

¹¹ Eeya malo tadia to olei Dauda; Eeya diila tamolipata danti lo Eeya. Tahuda lo Eeya, “Ngotaalio lo walau̒mu mapowaliyo-U̒ olongia u momalenta motuuloa̒ wolemu.

¹² Wonu mongo walau̒mu tatapu wau molotolo hilao to daanti-U̒, wau modungohe totoonulalo parentaa-U̒, yi u ohiheo-hiheolo mao̒ wali mai limongolio motuuloa̒ wolemu odelo olongia.”

¹³ Sababu Eeya malo lulaoto Sion; Eeya motohilaa Sion mowali tambati potibiluloa̒ lo Eeya.

¹⁴ Tahuda lo Eeya, “Teteewelo potibiluloa̒a-U̒ u ohiheo-hiheolo mao̒, Wau̒ ohilaa momalenta to tambati botie.

¹⁵ Totoonulalo u palaluolio mapoo̒ poluwo-U̒ mai wolo dadaata daa̒, tataaulio tahi mosikinia wohiya-U̒ ua̒alo tunggula mobutuhu.

¹⁶ Mongo iimamulio mopobiloheo̒ osalaamati monto ola-U̒; umatilio mamopolahu mola wau motingalaa̒ meengahu.

¹⁷ Teewe ngotaalio lo wali mai lei Dauda powaliyo-U̒ olongia; pamalentaalio mapoo̒ toheto-U̒.

¹⁸ Yilaidialio malaito moaa̒hu, bo mumuusuulio mapoo̒o-litolio.”