JABURU 112 - KITABI HABARI MOPIOHE

Osanangi tutu lotaa u mopiohu

¹ Pujiaalo mola Eeya! Potisanangilo tutu taa u saale, tamotohilaa totoonulalo palenta lo Eeya.

² Mongo walai̒o maa okawasa tolipu botie, wali mai lotaa mopiohu maa balakatialo.

³ Ngaalaa̒lio maakaya wau maa̒muru, wau tio mamoa̒ahu ohiheo-hiheolo mao̒.

⁴ Mobaango motinela todelomo u modio̒lomo ode taa juujulu, ode taa ua̒adili, tamoo-tolia̒ngoa wau tamodehu hilao.

⁵ Potisanangilo tutu taa u muura lohilao wau tamotohilaa mopobuloto boli juujulu todelomo totoonulalo uluusani.

⁶ Taa u mopiohu ohaasili; tio mae̒elaalo ohiheo-hiheolo mao̒.

⁷ Tio diila moohe mololimo habari u mobulilo, hilaalio molotolo sababu yakini to Eeya.

⁸ Tio diila molawalo meaalo moohe, sababu yakini musuulio mao̒laahe.

⁹ Tio molaya-layadeo̒ halataalio, wau mongohi sadaka totaa mosikini; tio laito mohutu u mopiohu, sababu uito tio okawasa wau hurumatiolio.

¹⁰ Taa moleeto moo̒onto olio wau mamoingo; timongolio mongiyoto lo dungito sababu molonuo̒. Lapatao̒ timongolio binasa; halaapani limongolio mooli u ohiheo-hiheolo mao̒.