JABURU 111 - KITABI HABARI MOPIOHE

Poloi̒laalo momuji ode Eeya

¹ Pujiaalo mola Eeya! Wolo lealeaatu lohilao watia mosukuru mola to Eeya to huungo aambua umati lo Eeya.

² Otutu moo̒linggolabu huhuu-hutuwaalo Eeya, paatuti tuletee lotau-tauwalo tao̒hilaalio leeto.

³ Kalaja lo Eeya udaa̒ wau ilopuji, oa̒adili lo Eeya ohiheo-hiheolo mao̒ diila opulitio.

⁴ Eeya boito tamoomonua wau tamoo-tolia̒ngoa, Eeya hemohutu mai huhuu-hutuwaalo u moo̒linggolabu, alihu ito debo moe̒ela to Eeya.

⁵ Eeya hemongohi mai lijiki totaa u saale, wau laito moe̒elai daantia lo Eeya.

⁶ Eeya malo pobilohei kawasa lo Eeya ode umati-Lio, wolo longohi mai olimongolio huta pusaka lo babaa-ngusawalo.

⁷ Eeya aadili wau tatapu boli molotolo hilao todelomo totoonulalo huhutuu-Lio, totoonulalo palenta lo Eeya mowali pongakuwalo.

⁸ Butoo̒ Eeya moo̒taahangi mololaalaaita, yilohi mai todelomo u otutu wau oa̒adili.

⁹ Eeya lolopato umati-Lio wau lohutu daantia ohiheo-hiheolo mao̒ woli mongolio. Tiolo Eeya tamantali tamolotolo boli buheli daa̒!

¹⁰ Titaalo tita ohilaa mowali molinepo musi mohurumati to Eeya, Eeya mongohi hilaa u paahamu to ngoa̒amila taa u modungohe. Ilopujiaalo Eeya mololaalaaita!