JABURU 11 - KITABI HABARI MOPIOHE

Eeya tambati potiduo̒lalo

¹ Duo̒lo diriheni lopolemboa̒ tamoolahua. Jaburu lei Dauda. Wau̒ motiduo̒la to Eeya; diila ohunalio moloi̒ya mai olau̒, “Poa̒ahuwalo batangamu debo odelo bulungi u tombo-tomboto ode hui̒du.

² Sababu taa moleeto helomua̒de buutio̒ wau lopohuli walao̒ panalio u lopomantahe totambati u modio̒lomo ode taa u juujulu.

³ Wonu otaratibu lotaa dadaata moa̒antulu, taa mopiohu diila olootolo.”

⁴ Eeya woluo to Bele-Lio u mantali, tambati huhuloa̒ li olongia-Lio woluo tosologa. Eeya hemo ngimato mai umati lomanusia wau motota totoonulalo huhutu limongolio.

⁵ Eeya hemotesi taa mopiohe wau taa moleeto, Eeya molonua̒a to taa udiila omanusia.

⁶ Taa moleeto hukuumanio lo Eeya wolo baala, wolo tulu, waliirangi wau dupoto umoo̒pobu.

⁷ Sababu Eeya mopiohu wau aadili, Eeya momonu taa u hipohutua mopiohu; taa juujulu mamoo̒onto wau motota to Eeya.