JABURU 108 - KITABI HABARI MOPIOHE

Dua̒ Mei̒ tuulungi to musu

¹ Lahu. Jaburu lei Dauda.

² Watotia yakini tio̒otutua, yaa Allahu Taa̒ala, watotia ohilaa mopolahu wau momuji mola to Eeya. Wuu pobongulo mola, jiwa laatia!

³ Wuu pobongulo mola, gaambusi wau kocapi! Watia ohilaa mopobongu dulahu u mamobutu mai.

⁴ Yaa Eeya, watotia ohilaa mosukuru mola to Eeya towolota lo babaa-ngusawalo. Otohilaa lowatotia mopolahu mola poloilaalo momuji ode Eeya towolota umati lomanusia.

⁵ Sababu ponu lo Eeya udaa̒ demola hulungo wau otatapu wau molotolo hilao lo Eeya demola hehee-ngowaalo.

⁶ Yaa Allahu Taa̒ala, pobilohelo mai odudaa̒ lo Eeya to hulungo, wau omumulia lo Eeya to ngoilanggubu dunia.

⁷ Poa̒ahuwalo mai mongowatotia wolo kawasa lo Eeya, tametaalo mai dua̒ lo mongowatotia, alihu tau-tauwalo tapilonua lo Eeya poa̒ahuwolo.

⁸ Lonto biluloa̒ lo Eeya u mantali Allahu Taa̒ala lotahuda, “Wau̒ ohilaa motingalaa̒ meengahu wau molaya-layadeo̒ huta lo Sikhem, Lumbaya Sukot mapahuto-U̒.

⁹ Gilead wau Manasye yito milikii-U̒, Epraim helemu lowajaa-U̒, wau Yehuda tunggudu yiladiaa-U̒.

¹⁰ Bo Moab yito tambati pongulowalo oa̒atu-U̒; Wau̒ lotingalaa̒ leengahu u loo̒haama to Pilistea. Ode Edom pilomahulu-U̒ kaatulu-U̒, odelo tuoto deu̒ tio milikii-U̒.”

¹¹ Tatoonu tamaa modelo olo watotia ode Edom? Tatoonu tamoo titau̒wa olo watotia ode kota obiintengi boito?

¹² Yaa Allahu Taa̒ala, wolo Eeya diila modudua̒ pee̒-pee̒enta wolo mongowatotia? Tingga mowali Eeya momaju pee̒-pee̒enta wolo suludadu lo mongowatotia?

¹³ Ambunguolo tuulungia mai mongowatotia monto musu, sababu bubantu lo manusia diila ohuna.

¹⁴ Pee̒-pee̒enta wolo Allahu Taa̒ala, ito mamo lotolo boli buheli daa̒; Eeyaalo tamopo olaaheo̒ musunto.