JABURU 105 - KITABI HABARI MOPIOHE

Allahu Taa̒ala wau umati-Lio

¹ Posukurulo mola to Eeya, pololadelo odudaa̒a-Lio, wungguliyalo huhutuu-Lio ode babaa-ngusawalo.

² Polahua mola poloilaalo momuji ode Eeya, pohabariyalo totoonulalo ilomata lo Eeya u moo̒linggolabe.

³ Eeyaalo, yaa Eeya Taa Laba-labaalo mantali; poti wengahulo sababu ito milikii-Lio, ngoa̒amila tamolubo mamusi motiwengahu.

⁴ Pohileaalo mola olootolo monto Eeya, tubowalo to Eeya laito.

^5-6 Wuu wali mai lei Abraham, wato-Lio wau wali mai lei Yako, tatilulao-Tio, eelailo mola ngoa̒amila moo̒linggolabe u hepilohutu lo Eeya, diila mao̒ lipata ngoa̒amila putuusani lo Eeya.

⁷ Eeya yito Allahu Taa̒alanto, putuusani lo Eeya pohu-pohutu to ngoilanggubu dunia.

⁸ Eeya laito moe̒elai daantia lo Eeya, danti lo Eeya pohupohutu ohiheo-hiheolo mao̒.

⁹ Daantia boito pilohutu lo Eeya wolei Abraham, wau lapatao̒ wolei Isihaka;

¹⁰ tulusi piloo̒tohe-Tio wolei Yako, lowali daantia ohiheo-hiheolo mao̒ ode umati lo Isirai̒lu.

¹¹ Tahudaalio, “Huta lo Kanaa̒n mawohi-U̒ mai olemu, mowali miliki pusakaamu.”

¹² Muloololio mai umati lo Allahu Taa̒ala hitumula odelo tau deli mola teto jumulaa limongolio bo ngoi̒di wambao̒.

¹³ Timongolio helonao̒ ode utoonulalo mao̒ lonto bangusa ode bangusa, helo limbato lonto lipu tuwau ode lipu uwewolio.

¹⁴ Bo Eeya diila lopoluli penu boli tatoonu tamodeehe olimongolio; domi timongolio, mongo olongia hepilo e̒ela lo Eeya,

¹⁵ “Diila mao̒ pomuyu tau-tauwalo tahe tilulao̒tu-U̒, diila mao̒ pohutu umoleeto tomongo nabi-U̒!”

¹⁶ Eeya lopodungga mai polobiti tolipu boito, wau lohama ngoa̒amila ua̒alo upilo dapato.

¹⁷ Bo Eeya lopoa̒hu ngotaalio leimulo mai woli mongolio, tei Yusu, tamaa pilotali odelo wato.

¹⁸ Oa̒atio tilihuto wolo pomungu, buloi̒o omaina rante wate.

¹⁹ Pulitio mao̒ malo toduo u yilamaliilio, tio pilopo otutu tahuda lo Eeya.

²⁰ Lapatao̒ olongia lo Masiri, tao̒kaawasa to babaa-ngusawalo, lolopato olio lonto tutupa.

²¹ Tio yiludualio tuugasi longulusi bele biluloa̒ saaha li olongia, wau yilohialio kawasa to ngoilanggubu halata upangolio;

²² olo haaku u longaatulu mongo pogawee li olongia, wau lotitau̒wa tokaumu lomomgo panggola.

²³ Lapatao̒ tei Yako lonao̒ ode Masiri wau lotitatapu mola teto odelo tau deli.

²⁴ Eeya lohutu mai umati-Lio hei̒lo duhenga mola dadaata, tilinggula timongolio lebe molotolo wolo laawanilio.

²⁵ Eeya lolomelo hilaa taulo Masiri tilinggula helo lonuo̒ umati-Lio wau helo pohutu mao̒ mongo wato-Lio lou̒ diila juujulu.

²⁶ Lapatao̒ Eeya lolao olei Musa wato-Lio wolei Haruna tatilulao-Tio.

²⁷ To Masiri timongolio helohutu u momoo̒o-linggolabewalo, huhuu-tuwaalo udaa̒ lonto Eeya,

²⁸ wau timongolio helo dudua̒a palentaa-Lio. Lapatao̒ Eeya lopowali lipu boito lodio̒loma daa̒.

²⁹ Dutulaa limongolio bilolio̒ Eeya lowali duhu, tilinggula ngoa̒amila uponulalio lopoowate.

³⁰ Tumbihe bolo hilanti-lantia̒alo mao̒ tolipu limongolio, tumbao̒ tilumuwota ode delomo bele biluloa̒ saaha li olongia.

³¹ To palenta lo Allahu Taa̒ala leidungga lo lalaa-ngowaalo, wau lalaa-muo̒waalo helo huntua daata-daatalo mao̒ to ngoilanggubu lipu.

³² Eeya lomopao̒ mai esi tulooo̒ didi, wau lopodungga ilato u dedeehita.

³³ Eeya lopo wombahe bungo lo angguru wau bungo lo ara, wau helo powombahe ngoa̒amila bubuu-ngowaalo limongolio.

³⁴ To palenta lo Eeya, leidunggalo mai bulita, jumulaalio dadaata daa̒, diilalo o yia̒apa.

³⁵ Bulita boito heilonga ngoa̒amila pilomulo to halabolu, wau helo poo̒pulito ngoa̒amila tilapulo huta.

³⁶ Lapatao̒ hepilate lo Eeya walao̒ talolai̒ tamohuhula daa̒ todelomo timii̒du ngaalaa̒ taulo Masiri.

³⁷ Lapatao̒ bangusa lo Isirai̒lu dilepito Eeya yilumualao̒, timongolio helodelo hulawa wau talaa̒; ngoa̒amilalo hiseehatia wau hilootola.

³⁸ Taulo Masiri ilodungga lou̒ laasa moohe wau tlimie̒ela hapato, oditolio timongolio silanangi tou̒ taulo Isirai̒lu malo monggato.

³⁹ Allahu Taa̒ala lomua̒de heengo u lohunggubei umati-Lio, wau tulu u lopobaango tou̒ hui.

⁴⁰ Timongolio helohile, tulusi pilopo dungga mai lo Eeya bilulu, timongolio yilohia lo Eeya roti lonto sologa tunggula lobutuhu.

⁴¹ Bilutao̒ Eeya hui̒dee botu, tulusi lopentelai taluhu u tilumolohe debo odelo dutulaa tohuta datahu wau luasi udelita diaaluo pilomulo.

⁴² Sababu Eeya moe̒ela danti-Lio to olei Abraham, wato-Lio.

⁴³ Yi dilepito Eeya, umati-Lio wolo wengahu, wau tau-tauwalo tahe tilulao-Tio wolo hitingalaa̒ meengahu.

⁴⁴ Huta lo babaa-ngusawalo yiludu lo Eeya ode limongolio, hahaala-boluwaalo limongolio pilowali miliki lo umati-Lio,

⁴⁵ alihu umati-Lio boito modungoheo̒ to bubuu-too̒owalo Eeya wau modudua̒ totoonulalo parenta lo Eeya. Pujiaalo mola Eeya!