JABURU 104 - KITABI HABARI MOPIOHE

Pojiaalo mola ode talo powali mai

¹ Pomujilo Eeya, wuu jiwa lowatia! Donggo boli udaa̒ Eeya, yaa Eeya lowatia! Eeya pakepake lo odudaa̒ wau omumulia,

² wau bileleeu̒ta lo tinelo. Eeya lomua̒de hulungo debo odelo kema,

³ wau lomongu bele lo Eeya toitaato tuluhu to hulungo. Hehee-ngowaalo pilowali lo Eeya kaleta lo Eeya, Eeya lotitae̒ to polipio̒ dupoto.

⁴ Dupoto pilopowali lo Eeya utolia lo Eeya, wau ilato tamoo mayawa to Eeya.

⁵ Wolo motoheto dunia pilopohuli lo Eeya to wumbatio, tilinggula diila tamoe̒etu u ohiheolo mao̒.

⁶ Eeya lohenggubei wolo auhe daa̒, taluhio loo̒olomo babaali-tutuo̒walo hihui̒-hui̒dea.

⁷ Tou̒ ilantingo Eeya, taluhee boito tilumolohu, tilumolohu wolo loo̒ohuu̒ sababu hulaubu suala lo Eeya.

⁸ Taluhee tilumolohu lolibaya huhuu-ideyaalo ode delomo lumbaya, ode tambati u pilopo dapato lo Eeya ode taluhu.

⁹ Tilantu lo Eeya ee̒enggadelo udiila mowali polibayalio, alihu diila mao̒ mohualingai moo̒olomo dunia.

¹⁰ Eeya lopolimbue̒ butu lotaluhu to luluu-mbayaalo, walao̒ dutulaa tilumolohu to wolota lo huhuu-luduwaalo,

¹¹ u lopeelu ngoa̒amila binatangi to halabolu, wau helopo lopato totoa̒ngo kokoo lodaiyalo oa̒ayua.

¹² To tililio bubuu-lungiyalo helohutu beelea; bubuu-lungiyalo boito helo hintuwolo to wolota lo duduu-ngowaalo.

¹³ Lonto hulungo pilopo tuhutai lo Eeya didi to hihui̒-hui̒dea, huta lopolu wolo tilapulo ilomata lo Eeya.

¹⁴ Eeya lopobutu mai huo̒yoto ode binatangi, wau ode manusia totoonulalo pilomulo hidala-dalaala. Yi tio lowali helo kelakela pilomulo,

¹⁵ wau ilotilapulo taluhu lo angguru u loo̒sanangi. Wau olo winulo jaitun ulohutu bayaalio ilumoyomo, wau ua̒alo u mongohi olio lotolo.

¹⁶ Bubuu-ngowaalo Eeya loo̒tapu didi dadaata daa̒ bungo lo ayu woohu Libanon u pilomulo lo Eeya lohihilao.

¹⁷ Mota teto helo tibeelea bubuu-lungiyalo, bulungi ranggungi lotibeelea to wohutio.

¹⁸ Huhuu-ideyaalo molanggato lowali tambati lo batade oa̒ayua; polandu motituuo̒ to patihu.

¹⁹ Hulalo pilowali lo Eeya poluoto wakutu, otaawa mato lodulahu saaa̒ti poa̒humalio.

²⁰ Wonu Eeya mopo tuhutai modio̒lomo, dulahu mowali hui, wau ngoa̒amila binatangi lo oa̒ayua, bolo hinao̒wa meaalo hitambota ode utoonulalo mao̒.

²¹ Sisii-ngawaalo buboto hemo heuwanga mololohe mangusa, mohile ua̒alo u pilopo dapato lo Allahu Taa̒ala.

²² Wonu mato lodulahu mobutu mai, timongolio mohalahu wau motibalata to tambati potituua̒lio.

²³ Lapatao̒ lumualai manusia u moponao̒ kalajaalio, wau tulusi mokalaja tunggula lolaango.

²⁴ Malo odito daata ilomata lo Eeya, yaa Eeya, ngoa̒amilalo pilowali lo Eeya wolo tinepo; dunia polupolu lou̒ pilowali mai lo Eeya.

²⁵ Bilohilo deheto u luasi bua̒bua̒de, wolo mahaluku u kikiio̒ wau udaa̒ u diilalo o yia̒apa.

²⁶ Mota teto kakaa-paliyaalo hibitea, wau Lewiatani, naha lo deheto u pilowali lo Eeya, hipoitohe.

²⁷ Timongolio ngoa̒amila hemoharapu to Eeya, u moo̒tapu ua̒alo to wakutuulio.

²⁸ Eeya longohi mai, wau timongoli lohimoa̒ao̒, Eeya lopo dapato mao̒, wau timongolio yilonga tunggula lotolu.

²⁹ Wonu Eeya mopalingo, timongolio moohe; wonu hamaa lo Eeya napasilio, timongolio binasa, wau muli mowali peaahuo̒ debo odelo bohulio mai.

³⁰ Bo wonu timongolio wohia lo Eeya napasi, timongolio pilowali; Eeya longohi tutumulo bohu ode dunia.

³¹ Pohileaala dua̒ odudaa̒ lo Eeya debo ohiheo-hiheolo mao̒! Pohileaala dua̒ Eeya meengahu wolo totoonulalo pilowali mai lo Eeya!

³² Eeya lomilohei dunia wau lohutu mao̒ hilumuhela, huhuu-ideyaalo diledeto Eeya, tilinggula poloi̒o yilumualo.

³³ Watia ohilaa mopolahu mola ode Eeya ngotupa lo tutumulo watia, mopolahu mola poloilalo momuji ode Allahu Taa̒alau̒ ngotilonggadu watia woluo.

³⁴ Pohileaala dua̒ lahu lowatia motuhatawa to Eeya, sababu Eeyaalo talohutu mai hilaa lowatia leengahu.

³⁵ Huliaalo mao̒ taa odusa mooli monto talu lodunia, huliaalo mao̒ taa moleeto mopulito binasa. Pojiaalo mola Eeya, wuu jiwa lowatia! Pojiaalo mola Eeya!