JABURU 103 - KITABI HABARI MOPIOHE

Ponu lo Allahu Taa̒ala

¹ Lonto olei Dauda. Pujiaalo mola Eeya, wuu jiwa laatia, lealeaatu hilaa lowatia, pomujilo tanggu-Lio u mantali.

² Pujiaalo mola Eeya, wuu jiwa laatia, diila mao̒ lipata totoonulalo opopiohu Eeya!

³ Eeya talo ngambungu mai ngoa̒amila dusaamu, talo poo̒luli mai totoonulalo ngongotumu,

⁴ Eeya talo lopatai nyawamu lonto kuuburu, talo poo̒daatai daa̒ olemu wolo tolia̒ngo wau odehu hilao.

⁵ Eeya talo potolu mai tutumulumu wolo u mopiohu, tilinggula yio̒ laito oontonga humula debo odelo bulungi rajawali.

⁶ Eeya helo ponao̒ butoo̒ wau ua̒adili ode ngoa̒amila taa u hideehea.

⁷ Eeya lopoi̒laalo ranjana lo Eeya odelei Musa wau totoonulalo huhuu-tuwaalo Eeya ode bangusa lo Isirai̒lu.

⁸ Sababu Eeya tamoomonua wau tamoo-tolia̒ngoa, Eeya diila opulita lo sabali wau ponu-Lio diila o eenggadelio.

⁹ Eeya diila mongantinga mololaalaaita, wau diila muluka u ohiheo-hiheolo mao̒.

¹⁰ Eeya diila mohukuumani olanto motuuu̒de wolo dusaanto, meaambo molontuli olanto motuuu̒de wolo totalanto.

¹¹ Bo ngoilanggato hulungo toitaato dunia, ngou̒daa̒ uito ponu lo Eeya ode taa u saale.

¹² Ngoilaminga tiimuru monto otolopa, ngoilamingo uito olo tilapi lo Eeya duduusanto.

¹³ Debo odelo tiyamo ngota motolia̒ngo mongo walai̒o, odito olo Eeya momonu taa u saale.

¹⁴ Sababu otaawa lo Eeya ito botie pilowali mai monto wolo, Eeya moe̒ela mai olanto bo peaahuo̒ wambao̒.

¹⁵ Manusia tutumulio limbulimbu debo odelo huo̒yoto; tio mongoa̒alo debo odelo bunga to halabolu;

¹⁶ wonu hiipa lodupoto, moolilo mola tio, tumbao̒ tambatilio diilalo otaawa.

¹⁷ Bo Eeya debo momonu mai taa usaale, opopio-Hio pohu pohutu wawaalia mola

¹⁸ ode taa u hemotidihu to daantia lo Eeya, wau wolo tatapu wau molotolo hilao hemoponao̒ palenta lo Eeya.

¹⁹ Eeya hemo malenta tosologa, Eeya olongia tao̒kawasa totoonulalo u hitua-tuawua.

²⁰ Pujiaalo mola Eeya, wuu mamaa-lai̒kati lo Eeya tamolotolo boli buheli daa̒, tahemo dungohe wau hemoponao̒ palenta lo Eeya.

²¹ Pujiaalo mola Eeya, wuu ngoa̒amila mahaluku tosologa, ngoa̒amila wato lo Eeya tahi pohutua kahandaki lo Eeya.

²² Pujiaalo mola Eeya, wuu ngoa̒amila u pilopowali mai to ngoilanggubu madala okokawasa lo Eeya. Pujiaalo mola Eeya, wuu jiiwa lowatia!