JABURU 102 - KITABI HABARI MOPIOHE

Dua̒ todelomo usuusa

¹ Dua̒ lotaa modutolo u todelomo owowoluwoa malulupuhu wau moongolo sama-samaata mopoi̒laalo suusa to Eeya.

² Yaa Eeya, dungohilo mai dua̒ lowatotia, huliaalo mao̒ iibodu lowatotia demola Eeya.

³ Diila mao̒ pomalingo monto watotia wonu watotia todelomo usuusa. Dungohilo mai wonu watotia mongiibode, wau hua̒a tametilo mai watotia.

⁴ Tutumulo watotia yilooli debo odelo poloo̒; tutuu-lalowaalo watotia lowali bohu debo odelo tulu.

⁵ Watotia moraasa molulupuhu wau moongolo debo odelo huo̒yoto mohengu, wau iloolia lo napusu molamelo.

⁶ Watotia mopoi̒laalo suusa wolo suala moo̒ohuu̒; wawao̒ watotia bolo alipo pomolu tulalo.

⁷ Watotia debo odelo bulungi undani tohuta datahu wau luasi udelita, debo odelo maluo̒ moluluwola to tuodu u tutuuwau.

⁸ Watotia diila mowali motuluhu, debo odelo bulungi u tutuuwau towatopo bele.

⁹ Ngotupa lodulahu musu hemohina olo watotia; tanggulo watotia pilopo waliilio laa̒anati lotaa u moingo olo watotia.

¹⁰ Watotia hemo lamela peaahuo̒ debo odelo roti, minumani lowatotia helo ulauwa wolo ponu,

¹¹ sababu Eeya malomintaa̒ wau lopomahula olo watotia todelomo omuluka lo Eeya uwali-walihuhu.

¹² Tutumulo watotia lopaluto debo odelo wolilu tou̒ lolaango; watotia malo lolante debo odelo huo̒yoto.

¹³ Bo Eeya, yaa Eeya, Olongia u ohiheo-hiheolo mao̒, debo eelaalo wawaalia mola.

¹⁴ Eeya matimihulai wau momonu Sion, saaa̒tilio malei dungga u modehu hilao toolio.

¹⁵ Sababu mongo wato lo Eeya motolia̒ngo olio, penu boli tio malowali tuodu. Timongolio helodehu hilao to olio, penu boli tio malowali peaahuo̒.

¹⁶ Kawasa lo Eeya mao̒ohe lo babaa-ngusawalo; wau odudaa̒ lo Eeya diila otohilaa lo ngoa̒amila olongia,

¹⁷ wonu bolo Eeya muli momongu Sion, wau modiambanga momaju todelomo odudaa̒ lo Eeya.

¹⁸ Tio mamo dungohe dua̒ lo umati-Lio taduto-dutolo, wau diila mololimo polohone limongolio.

¹⁹ Tuladelo ngoa̒amila huhutu lo Eeya duo̒lo hilaide tamaa meidungga mai, alihu bangusa tadiipo pilotutulio mai mowali momuji mola to Eeya.

²⁰ Eeya momilohei monto tambati lo Eeya u molanggato, monto sologa Eeya momilohei ode dunia

²¹ u modungohe totoonulalo lapali u tilumoodu sababu usuusa taulo tutupa wau molopata taa u hilukuumani mate.

²² Yi tanggulo Eeya mapo loladulo to Sion, wau Eeya mapuji-pujiolo to Yerusalemu,

²³ tou̒ babaa-ngusawalo wau yiyii-laidiyaalo motia̒mbu u moi̒baadati to Eeya.

²⁴ Eeya helo polupuhei olootolo watotia tou̒ watotia donggo humula mai, wau lopolimbuo̒ tutumulo watotia.

²⁵ Lapatao̒ watotia loloi̒ya, “Yaa Allahu Taa̒ala diila mao̒ hamaawa nyawa lowatotia to tomutaa̒ lo tutumulo watotia.” Yaa Eeya, Eeya tumutumulo ohiheo-hiheolo mao̒,

²⁶ muloololio mai Eeya lopowali mai dunia; boli hulungo huhutu uluu̒ lo Eeya.

²⁷ Ngoa̒amila boito mamooli, bo Eeya debo woluo; ngoa̒amila boito mamoodulo debo odelo pakeyangi. Tapilo mao̒ lo Eeya debo odelo boo̒ deedelo, tulusi ngoa̒amilalo mabinaasa.

²⁸ Bo Eeya debo tutuuwauwa, tutumulo Eeya diila tao̒pulitio.

²⁹ Walao̒ wombu lo mongowatotia matumumulo wolo aamani, wau laito dame todelomo poloduolo Eeya.