JABURU 101 - KITABI HABARI MOPIOHE

Danti ngotaalio li olongia

¹ Jaburu lei Dauda. Watia ohilaa mopolahu mola pasali lo otatapu wau olootolo hilao wau ua̒adili, ode Eeya, yaa Eeya, lahu poloilaalo momuji lowatia!

² Watia ohilaa mopoo̒tuoto dudelo tutumulo udiila o aibu. Omolua Eeya meidungga mai odelaatia? Watia ohilaa tumumulo mantali tobele lowatia,

³ ololeeto diila tapoluli lowatia. Yilonuo̒ lowatia huhutu lotaa momaahe iimani, wau diila mohuto mou̒ruusania woli mongolio.

⁴ Watia diila mohuto mohutu udiila motulidu hilao wau diila mohuto meituanga todelomo u moleeto.

⁵ Taa u hemopitana wolo poo̒poo̒oyo mapobinasa mao̒ lowatia. Taa u sombongi wau molanggato lohilao diila tapoluli lowatia.

⁶ Otohilaa lowatia taa utatapu wau molotolo hilao to Allahu Taa̒ala; timongolio mowali motibiluloa̒ tobele lowatia. Taa u tumutumula lou̒ diila o aibu mowali momaya olaatia.

⁷ Tamoo-himbuloa diila mowali motibiluloa̒ tobele lowatia; tamoo-himbuloa diila tamoo̒ taahangi totalu lowatia.

⁸ Monto dulahu odungga dulahu mapoo̒ pulito lowatia tau-tauwala moleeto tolipu botie. Ngoa̒amila taa hipohutua u moleeto mapoo̒ pulito lo watotia monto kota yaa Eeya.