JABURU 10 - KITABI HABARI MOPIOHE

Dua̒ momolohone ua̒adili

¹ Yilongola Eeya molamingo, yaa Eeya wau lotituuo̒ tou̒ mongowatotia ileepita?

² Wolo batingga taa moleeto hemodeehe taa mosikini; poluliaalo mao̒ timongolio otaala lo pajalalio lohihilao.

³ Taa moleeto hemo latabu pasali ilohilaalio u moleeto, taa langgamu hemolaa̒nati wau diila mololimo to Eeya.

⁴ Taa odusa diila pandungi to Eeya, sababu batinggalio tio hemo mikiilangi Allahu Taa̒ala diaalua.

⁵ Taa moleeto otilapulo todelomo totoonulalo tolopanilio; tio diila motota meaalo mongalati butoo̒ lo Eeya wau diila monganggapu gambangi ngoa̒amila laawanilio.

⁶ Ualio todelomo hilao, “Wau̒ maa ohaasili, wau wawaalia mola debo odelo taa udiila tumu-tumula moleeto.”

⁷ Tio tulusi hemo laa̒nati, monganjamu wau mohimbulo, tataa heelio polupolu lou̒ molonuo̒ wau moleeto.

^8-9 Tio motituuo̒ to kakaa-mbunguwalo ohilaa momate taa udiila ototala mate-mateelo mao̒. Debo odelo singa tio hemohima to dibalaka lodiu̒to hemohehulo taa udiila olotoolo. Tio hemo langgu taa mosikini to tambati udiila otau, tuhuolio wau diledei̒o lonao̒.

¹⁰ Tio hemo tibunggu dapa-dapato modangapo; tio hemo podehu tau wolo diila omanusia.

¹¹ To pikiilangilio, “Allahu Taa̒ala maloo̒ lipato wau diila helo poo̒tuotai; u lololaalaaita Eeya diila loo̒onto olau̒!”

¹² Tihuloolo mai, yaa Eeya, hukuu-maniyalo taa moleeto! Eelailo mai taa u hideehea!

¹³ Yilongola taa moleeto tulusi hemohina to Allahu Taa̒ala wau hemo mikiilangi Allahu Taa̒ala diila tamo hukuumani mai olio?

¹⁴ Bo Eeya loo̒onto mai olio; piloo̒tuotoi lo Eeya osuusa wau polodutolo, wau laito dapa-dapato u motulungi. Taa udiila olotolo mohudu batanga ode Eeya, Eeya laito hemo tulungi mai taa u mosikini.

¹⁵ Aantulualo mai okokawasa lotaa moleeto wau tamomaahu palenta; hukuu-maniyalo mai timongolio sababu huhutuulio tunggula timongolio molilihu.

¹⁶ Eeya hemomalenta u ohiheo-hiheolo mao̒; babaa-ngusawalo tadiila motota to Eeya mamooli monto huta lo Eeya.

¹⁷ Yaa Eeya, Eeya modungohe dua̒ lotaa hina wau hemo poo̒lotolai hilaa limongolio.

¹⁸ Walao̒ didu otiilo otiyamo wau taa hideehea piloduulua lo Eeya palakalaalio, alihu diaaluo taa u mopoo̒ohe olimongolio.